Мамлакатимизнинг Париж шаҳридаги элчихонаси Франциянинг олий ўқув юртлари ва йирик кутубхоналарига ўзбек тилида чоп этилган адабиётларни мунтазам равишда тақдим этиб келади.
Ушбу йўналишда амалга оширилган ишлардан бири “Ўзбек тили хорижликлар учун” ўқув қўлланмасининг Франциянинг Шарқ тиллари ва цивилизациялари миллий институти кутубхонасига совға қилиниши бўлди.
Мазкур институт кутубхонаси илмий ишлар бўйича директори Бенжамин Гишар тақдим қилинган китоблар учун ўз миннатдорчилигини билдирди. Ўзбек тилидаги адабиётларнинг кўпаяётгани талабаларда ўзбек тилини, маданиятини, тарихини ўрганишга қизиқишини ошишига туртки бераётганини таъкидлади.
“Бу китоблар институтимиз талабалари, ўқитувчи ва профессорларига жуда фойдали бўлади ва ўзбек тили бўйича билим ва сўз бойликларини ошишига хизмат қилишига ишонамиз”, – деди Бенжамин Гишар.
