Белгиланишича, Республика ихтисослаштирилган фтизиатрия ва пульмонология илмий-амалий тиббиёт маркази (кейинги ўринларда - Марказ) фтизиатрия ва пульмонология касалликларини профилактика қилиш, ташхислаш, даволаш ҳамда мазкур соҳаларни юқори малакали мутахассислар билан таъминлаш бўйича республикада бош муассаса ҳисобланади.
Қуйидагилар Марказнинг асосий вазифалари ҳисобланади:
- соғлиқни сақлаш муассасаларида ихтисослаштирилган фтизиатрия ва пульмонология тизимларини илғор хорижий тажриба асосида такомиллаштириш ва модернизация қилиш;
- фтизиатрия ва пульмонология йўналишида вилоят (республика), туман (шаҳар) ҳудудий тиббиёт муассасалари ўртасида тизимли узвий боғлиқликни ҳамда услубий вертикал бошқарувни таъминлаш;
- туман (шаҳар) фтизиатрия муассасалари қошида кундузги стационарларни ташкил этиш орқали аҳолига малакали фтизиатрия ва пульмонологик тиббий ёрдам кўрсатиш ҳажмини ошириш ҳамда республика фтизиатрия реабилитация марказларида ўпка носпетсифик касалликларининг шифохонадан кейинги даврдаги кузатувини ташкиллаштириш;
- туберкулёз ва ўпка носпетсифик касалликлари бўйича эпидемик вазиятни мунтазам таҳлил қилиш ва мониторингини олиб бориш, беморларнинг миллий электрон реестрини юритиш ва бошқалар.
Ҳужжат билан 2023-2026 йилларда фтизиатрия ва пульмонология хизматини ривожлантириш бўйича мақсадли кўрсаткичлар тасдиқланди.
Қуйидагилар ташкил этилади:
- туман (шаҳар) кўп тармоқли марказий поликлиникалар таркибидаги фтизиопулмонология бўлимлари;
- тунги уйқу сифати ва нафас олиш функцияси бузилишларини ташхислаш ва даволаш мақсадида «Уйқу апноэ» марказлари.
2023 йилдан бошлаб қуйидаги йиллик кўрсаткичларни ошириш назарда тутиляпти:
- латент туберкулёз инфекциясига скрининг текширувлари сони – 1 миллион нафаргача;
- туберкулёз микробактериясининг айрим дори воситаларига резистентлигини аниқлайдиган ген-молекуляр ташхислаш қамрови – 120 минг нафаргача;
- туберкулёз билан касалланган 18 минг нафаргача беморларни дори воситалари билан таъминлаш, шу жумладан:
1-қатор (дорига сезувчан туберкулёз билан касалланган беморлар) дори воситалари бўйича - 15 минг нафаргача;
2 ва 3-қаторлар (дорига резистент туберкулёз билан касалланган беморлар) дори воситалари бўйича - 3 минг нафаргача.
Марказ ҳузурида Шокир Алимов номидаги илмий мактаб, шунингдек Миллий референс лаборатория ва илмий-амалий тренинг маркази очилади.
Ҳужжат Қонун ҳужжатлари маълумотлари миллий базасида эълон қилинган ва 2023 йил 21 январдан кучга кирди, деб хабар беради «Norma».
