Сўнгги йилларда дунёда қурилиш жараёнида энергия тежамкор, инновацион қурилиш материалларидан фойдаланиш бино-иншоотнинг таннархи арзон бўлиши ҳамда қурилиш ишларини тез фурсатда, сифатли амалга оширишда муҳим омил бўлиб хизмат қиляпти.
Ривожланган давлатларда ғишт ўрнига энергия тежамкор газобетондан фойдаланиш кенг оммалашган бўлиб, мамлакатимизда ҳам ушбу қурилиш материалларини ишлаб чиқаришни кенг йўлга қўйиш, бу йўналишда жаҳон тажрибасини қўллашга алоҳида эътибор бериб келинмоқда. Хусусан, “Ўзсаноатқурилишматериаллари” уюшмаси томонидан газобетон ишлаб чиқариш бўйича бир қатор инвестиция лойиҳалари амалга оширилмоқда. Натижада янги корхоналар фаолияти йўлга қўйиляпти.
Таҳлилларга кўра, уюшма масъуллигида 2020 йилда автоклав газобетон ишлаб чиқаришга ихтисослашган йиллик қуввати 1,650 минг метр куб бўлган 8 та корхона фаолияти йўлга қўйилган. Тошкент вилоятининг ўзида йилига 200 минг метр куб ишлаб чиқариш имкониятига эга “Mega Block Investment” МЧЖ ва “Тошкент Темир Бетон” УК ишга туширилди. Шунингдек, Бухоро ("Ханаду Гранд плюс" МЧЖ – йиллик қуввати 50 минг метр куб) ва Жиззах (“INTER GROUP AGRO EXPORT” МЧЖ – йиллик қуввати 100 минг метр куб) вилоятларида ҳам газобетон ишлаб чиқариш бўйича лойиҳалар амалга оширилган.
Тошкент вилоятининг яна бир ҳудуди – Оҳангарон шаҳрида Европа технологиялари асосида бунёд этилган “East mining invest” МЧЖ ҚК томонидан йиллик ишлаб чиқариш қуввати 500 минг метр куб бўлган корхона фаолияти йўлга қўйилди. Эътиборлиси, “Arton” компанияси томонидан Фарғона, Навоий ва Хоразм вилоятларида ҳам ана шундай корхоналар ишга туширилмоқда.
Ахолини арзон-уй жойлар қуришда фойдаланиладиган маҳаллий, энергия тежамкор қурилиш материаллари билан таъминлаш мақсадида “Ўзсаноатқурилишматериаллари” уюшмаси томонидан тизимли ишлар амалга оширилмоқда. Хусусан, автоклав газобетон блоклари ишлаб чиқаришга алоҳида эътибор қаратилган.
Жорий 2021 йилда ушбу йўналишда йиллик ишлаб чиқариш қуввати 1 млн метр куб бўлган 8 та лойиҳа амалга оширилади. Автоклав газобетон ишлаб чиқарувчи энг йирик корхоналар Тошкент вилоятида ишга туширилиши режалаштирилган. Хусусан, ҳудудда “Ecoton sharq” МЧЖ (йиллик қуввати 50 минг метр куб) "Gazoblok Company" МЧЖ (йиллик қуввати 200 минг метр куб), "Xinyuan Building Materials Company" МЧЖ (йиллик қуввати 50 минг метр куб) ва “Алижон” МЧЖ (300 минг метр куб) каби тадбиркорлик субъектлари яратилади.
Бухоро, Андижон ва Сирдарё вилоятларида ҳам мазкур йўналишда 3 та лойиҳани амалга ошириш ишлари жадал суръатларда олиб бориляпти. Айни дамда ушбу корхоналарга ускуналар ва мутахассисларни олиб келиш ишлари амалга оширилмоқда. Шу билан бирга, бино ва иншоотларни қуриш ишлари давом этмоқда.
Маълумот учун, газобетон — ғовак (тешик-тешик) бетоннинг бир тури бўлиб, замонавий қурилиш материали ҳисобланади. Уни баъзан “сунъий тош” деб ҳам аташади. Оддий бетондан фарқли, таркибида 1-3 миллиметрли пуфаклар мавжуд бўлиб, улар туфайли бетон енгил, етарли даражада мустаҳкам, иссиқ ва совуқдан яхши ҳимоялаш хусусиятларига эга бўлади. Шунингдек, табиий газни 8 марта кам сарфлаши, энергия тежамкорлиги ва энг асосийси, унумдор тупроқнинг ишлатилмаслиги билан пишиқ ғиштдан бир неча маротаба афзаллиги билан ажралиб туради. 1 метр куб ғишт 1800-2000 килограмм оғирликка эга бўлса, шу ҳажмдаги газобетоннинг оғирлиги атиги 500-700 килограмни ташкил этади.
“Ўзсаноатқурилишматериаллари” уюшмаси
матбуот хизмати
