Ўзбекистон Республикаси Президенти Шавкат Мирзиёев ва Германия Федерал канцлери Ангела Меркелнинг жорий йил 12 март куни бўлиб ўтган видеоанжуман шаклидаги саммитидан руҳланиб ёзилган мақола 2016 йил 14 декабрь куни янги Президент иш бошлагандан буён Ўзбекистонда жуда кўп ўзгаришлар бўлгани билан бошланади.
“Германия ва Ўзбекистон — катта имкониятга эга шериклик” сарлавҳали мақолада “Қайсидир маънода Ўзбекистон ўзини қайта кашф этди. Аниқ мақсадли йўлда амалга оширилаётган ислоҳотлар барқарорлашди. Мамлакат очилди ва минтақа локомотивига айланмоқда. Бу ривожланиш Германия учун ҳам, Ўзбекистон учун ҳам бирдек манфаатли”, дейди муаллиф.
Мақолада Шавкат Мирзиёевнинг Президент сифатида амалга оширган илк баёнотлари мамлакат ичкарисида ҳам, халқаро жамоатчиликда ҳам зўр иштиёқ билан кутиб олингани, ўз навбатида, одамларда “Янги давлат раҳбари Ўзбекистонда туб ислоҳотлар ва ижобий ўзгаришларни бошлайдими?” деган шубҳа ҳам бўлгани, мамлакатнинг бугунги ёрқин қиёфаси эса бу каби ишончсизликларга буткул барҳам бергани ҳақида баён этилади.
Германия нашри эътироф этишича, Ўзбекистон учун имконсиздек бўлиб туюлган янги тараққиёт йўлидаги ғоялар, йирик лойиҳалар ва мақсадлар кўп ўтмай ҳаётда ўз аксини топа бошлади. Янги давлат раҳбари ўз олдига қўйган мақсадларни босқичма-босқич амалга оширмоқда.
“Президентнинг йиллик Мурожаатномаси одамларга бўлажак ўзгаришлар босқичларини кўрсатиши билан ҳам муҳим аҳамият касб этмоқда. Давлат раҳбарининг катта ислоҳотлар йўлида ўзи билан бирга барча раҳбарлар ва фуқароларни ҳам фаолликка чорлаши мамлакатда янги тараққиёт оҳангини ўрнатди”, дея мақолани давом эттиради муаллиф.
Шунингдек, Ўзбекистон қўшни давлатлар билан дўстона муносабатларни йўлга қўйгани, кўп йиллар давомида баҳсли бўлиб келган муаммолар — чегара ҳудудлар, сув ва бошқа масалаларга оқилона ечим топилгани, пировардида, дунё ҳамжамиятининг Ўзбекистонда катта ўзгаришлар рўй бераётганига ишончи ортгани ҳақида сўз боради.
Муаллифнинг талқинича, 2017 йил Самарқандда БМТ шафелигида Марказий Осиёда хавфсизлик ва барқарор ривожланишни таъминлаш бўйича халқаро конференция ҳам янги Ўзбекистон ўзини халқаро майдонда танитган тадбир бўлди.
Мамлакатда жадал ва тизимли ислоҳотлар Европа Иттифоқи томонидан ҳам илиқ кутиб олингани, пировардида, халқаро ташкилотнинг Ўзбекистон ва у орқали Марказий Осиё давлатларига бўлган қизиқиши ортгани мисоллар билан келтириб ўтилган. “Ўзбекистон тобора минтақанинг маркази ва юрагига айланмоқда”, дейди муаллиф.
Президент Шавкат Мирзиёевнинг 2019 йил январь ойидаги Германияга расмий ташрифи, шу йил май ойида эса Федерал Президент Франк Вальтер Штайнмайернинг мамлакатимизга жавоб ташрифи чоғида эришилган келишувлар ва унинг тарихий аҳамияти ҳақида ҳам сўз боради. Ҳар икки ташриф мамлакатларимиз ўртасидаги муносабатларнинг янги даврига йўл очди.
Мақолада Президент Шавкат Мирзиёев ва Федерал канцлер Ангела Меркелнинг жорий йил 12 март куни бўлиб ўтган видеоанжуман шаклидаги саммити тафсилотларига ҳам батафсил тўхтаб ўтилган. Бу саммит Ўзбекистон ва Германия ўртасидаги катта имкониятга эга шериклик муносабатлари ривожи йўлида муҳим аҳамиятга эгалиги таъкидланган.
* * *
“Berliner Morgenpost” — Германиядаги кундалик газета. Нашрнинг кунлик адади 100 мингдан зиёдни ташкил этади. Онлайн шакли билан қўшиб ҳисоблаганда кунлик аудиторияси 500 минг атрофида.
“Германия ва Ўзбекистон — катта имкониятга эга шериклик” сарлавҳали мақола “Berliner Morgenpost”дан ташқари 30 га яқин газета, журнал ва Германиядаги интернет нашрлари, хусусан, “Deutsche Presse Agentur (dpa)” ахборот агентлиги сайтида эълон қилинган.
Штаб квартираси Гамбург шаҳрида жойлашган “Deutsche Presse Agentur (dpa)” мамлакатдаги энг йирик ахборот агентлиги саналади. Агентлик 80 давлатда ўз ваколатхонасига эга.
