Гап шундаки, кеча бўлиб ўтган енгил атлетика бўйича узунликка сакраш баҳсларида терма жамоамиз аъзоси, 15 ёшли самарқандлик қизимиз Шарифа Давронова 14,30 метр натижа қайд этиб, пешқадамга айланиб олган эди. Аммо, орадан кўп ўтмай туркиялик спортчи Туғба Данишмас 14,41 метр натижа билан ҳамюртимизни қувиб ўтди.
Лекин ушбу вазиятда туркиялик спортчи қизил чизиқни кесиб ўтган ва табиийки унинг натижаси бекор қилиниши керак эди.
Афсуски, ўша вазиятда ҳакамлар хатога йўл қўйишди. Боз устига Ўзбекистон ва Озарбайжон терма жамоалари томонидан билдирилган эътирозларга тезкор муносабат билдирилмади. Стадионга йиғилган омманинг қаршисида гуёки Туғба Данишмас ғолибга айланди.
Кейинчалик ҳакамлар ҳайъатининг қайта кўриб чиқиши натижасида 1-ўринда кўрсатилган туркиялик спортчи Тугба Данишмас энг яхши натижасини амалга оширганда тақиқланган чизиқни босгани аниқланди ва ушбу уриниш бекор қилинди. Шу тариқа, Шарифа Давронова уч ҳатлаб сакраш йўналиши чемпионига айланмоқда.
Мусобақа қоидасига биноан шикоят киритиш ҳуқуқидан унумли фойдаланган Ўзбекистон енгил атлетика федерацияси мураббийлар штаби мазкур ҳолат юзасидан ўз вақтида ҳакамлар қўмитасига раддия берди. Мусобақалар якунида ушбу ҳолат экспертлар томонидан кўриб чиқилди.
Якунда спортчи техник хатоликка йўл қўйгани, яъни қизил чизиқни кесиб ўтгани тасвирни қайта кўриш орқали аниқланди ва Туркия терма жамоаси аъзосининг 14,41 метрлик натижаси бекор қилинди.
Шу тариқа, бир ҳафта олдин Колумбияда ўтган енгил атлетика бўйича ёшлар ўртасидаги жаҳон чемпионатида ғалаба қозонган Шарифа Давронова 14,30 метр натижаси билан Ислом бирдамлиги ўйинларида олтин медал билан тақдирланади.
