Айтиш лозимки, анжуманда иштирок этиш учун минг нафардан зиёд офтальмолог онлайн рўйхатдан ўтган, шунингдек, юртимизнинг 150 нафардан зиёд офтальмологлари – тиббиёт олий таълим муассасалари офтальмология кафедралари мудирлари, профессор олимлари, офтальмологик шифохоналар, хусусий клиникалар раҳбарлари, ҳудудларнинг бош офтальмологлари таклиф этилган.
Анжуман дастурида офтальмологиянинг деярли барча йўналишларидаги долзарб муаммолар, кенг тарқалган кўз касалликлари диагностикаси ва даволаш усуллари билан боғлиқ мавзулар қамраб олинган.
Тадбирда таъкидланишича, юртимизда тиббиётга, хусусан, офтальмология йўналишига катта эътибор қаратилаётгани сабабли ҳозирда Республика ихтисослаштирилган кўз микрохирургияси илмий-амалий тиббиёт маркази барча замонавий юқори технологик тиббий ускуналар билан жиҳозланган бўлиб, биргина 2018-2020 йилларда 139 та шундай ускуналар билан таъминланди.
— Марказ офтальмология соҳаси бўйича мамлакатимиз аҳолисига ихтисослашган тиббий ёрдамни ташкил этишни мувофиқлаштирувчи ва услубий муассаса ҳисобланади. Республикада жами 49 турдаги офтальмологик касалликларни даволаш бўйича 172 турда тиббий хизматлар кўрсатилади, — дейди Республика ихтисослаштирилган кўз микрохирургияси илмий-амалий тиббиёт маркази директори, тиббиёт фанлари доктори Азамат Юсупов. — Республика ихтисослаштирилган кўз микрохирургияси илмий-амалий тиббиёт марказида 150 қатновга мўлжалланган консультатив-диагностик поликлиника, 50 ўринли стационар, кунига 50-60 та операция бажариш имконини берадиган 8 та автоматик жарроҳлик столи бир вақтда ишлайдиган жарроҳлик блоки мавжуд.
Марказ фаолиятининг асосий йўналишлари катаракта ва глаукома жарроҳлиги, реконструктив жарроҳлик, шох парда жарроҳлиги, лазер жарроҳлиги, болалар кўзининг микрохирургияси, пластик жарроҳлик, болалар кўзларини замонавий махсус компьютер дастурлари асосида даволаш, шунингдек, индивидуал кўз протезларини ясаш ва қўйишдан иборат.
Катаракта касаллигида факоэмулсификация усулини қўллаб, турли сунъий гавҳарлар, шунингдек, мультифокал, яъни узоқ ва яқинни кўзойнаксиз кўриш имконини берадиган сунъий гавҳар имплантацияси амалга ошириляпти. Ҳар йили 3,5 мингдан ортиқ шундай жарроҳликлар бажарилади.
Марказ касалланган шох пардани тиниқ донор шох пардага алмаштириш жарроҳлик амалиётини амалга оширадиган ягона кўз клиникасидир. Донор АҚШнинг Флорида штати, Тампа шаҳридаги «Lions Eye Institute for Transplant and Research» номли кўз банкидан келтирилади. Ҳар йили 40 га яқин оғир шох парда касалликларида уни кўчириб ўтказиш жарроҳлик амалиёти бажарилади.
Ҳозирда юртимизнинг 7 та ҳудуди (Хоразм, Сурхондарё, Бухоро, Қашқадарё, Самарқанд, Фарғона вилоятлари ва Қорақалпоғистон Республикаси)да марказнинг филиаллари фаолият кўрсатяпти. Уларнинг барчаси юқори технологик ускуналар билан таъминланган.
«Кўз микрохирургиясининг долзарб муаммолари» мавзуидаги офтальмологларнинг биринчи халқаро Конгресси 17 сентябрга қадар давом этади, деб хабар беради Соғлиқни сақлаш вазирлиги матбуот хизмати.
