Ғарбий бенгаллиялик фермер Минту Рой “Титаник” кемасига ўхшаш уй қурди. Фермернинг айтишича, у болалигидан чўкиб кетган лайнерга ўхшаган бинода яшашни орзу қилган.
Ҳиндистонлик улғайгач, у ўзининг ўша орзусини амалга оширишга қарор қилди. Бироқ кўпчилик муҳандислар унинг мазкур лойиҳаси билан ишлашни хоҳламашмади ёки жуда кўп пул сўрашди. Натижада Рой ҳаммасини ўзи бажаришга қарор қилди.
У қўшни Непалга девор қуришни ўрганиш учун борган ва кейин қурилишни бошлаган. Лойиҳага 180 минг долларга яқин маблағ сарфланган. Бироқ бу етарли эмас эди, маблағ етишмаслиги туфайли у 2010 йилда бошланган уй-кема қурилишини якунлай олмади. Шунга қарамай, Рой бир кун келиб катта оиласи билан Титаникга кўчиб ўтишига ишонади. Қолаверса, вояга етган ўғли унга молиявий ёрдам бермоқчи.
Ҳиндистонлик уй-жойдан ташқари, бинонинг иккинчи қаватидан ўз бизнеси учун фойдаланмоқчи, у ерда кичик ресторан очмоқчи, дейилади mir24.tv сайтида.
