Яқинда юртимизда якунига етган 23 ёшгача бўлган футболчилар ўртасидаги Осиё чемпионатининг қувончли лаҳзалари ҳали ёдимиздан кўтарилгани йўқ. Футболчиларимиз, гарчи иккинчи ўринни олган бўлса-да, ажойиб ўйин намойиш этиб, мухлисларнинг ҳам, мутахассисларнинг ҳам эътиборини тортди.
Терма жамомиз сафида туп сурган ярим ҳимоячи Ҳожимат Эркинов турнир давомида энг яхшилардан бири эканлигини кўрсатди. Шу боис бўлса керак, унга кўплаб хориж жамоларидан қизиқиш билдирилмоқда. Сал аввалроқ матбуотда Россиянинг “Спартак” ва “Краснодар” клублари Ҳожиматни ўз сафларига қўшиб олишлари мумкинлиги айтилган эди. Кейин Championat.Asia Ҳ. Эркинов Москванинг “Торпедо”си ўтаяпти деган хабар тарқатди.
Назаримизда шу гап ростга ўхшаяпти. Чунки куни кеча футболчи ўзининг инстаграмдаги саҳифасида қадрдон жамоси “Пахтакор” билан хайрлашди. Демак, унинг бошқа жамоага ўтиши ҳал бўлган. Лекин қайси жамоага эканлигини ҳозирча сир сақланмоқда. Бу сир бугун-эрта маълум бўлса, ажабмас. Биз эса футболчимизнинг кейинги фаолиятига муваффақиятлар тилаймиз.
