ФИФА президенти Жанни Инфантино Дохада ўтган Футбол ассоциациялари халқаро кенгаши – IFAB йиғилишида бир ўйинда бешта ўйинчи алмаштиришга бутунлай рухсат берилганини таъкидлар экан, ташкилот яна бир нечта масаларни ҳам ўрганиб чиқаётганини айтди.
Инфантинонинг қайд этишича, 1,5 соатга мўлжалланган футбол ўйини баъзан 46-48 дақиқа давом этяпти. ФИФА IFAB билан ҳамкорликда ўйин соф 1,5 соат давом этиши масаласини ўрганяпти.
ФИФА президенти айтган гаплар амалга ошадиган бўлса, футболда ҳам хоккей ва мини футболдаги каби фақат ўйналган вақт ҳисобга олинади. Шунда ўйинчилар томонидан вақтни атайин чўзиш, жароҳат олмаса ҳам майдонда ётиб олиш, тўпни майдон ташқарисига тепиб юбориш каби салбий ҳолатлар барҳам топади.
Хўш, Инфантино айтган гаплар амалга ошадими? Буни жамоатчилик қабул қиладими? Ҳозирча бу саволларга жавоб йўқ.
“Албатта, бу таклифга эътироз билдирадиганлар ҳам бор. IFAB ҳар қандай таклифни эшитишга ва ўрганиб чиқишга тайёр”, дейди ФИФА президенти.
