Меморандумни имзолашдан кўзланган мақсад контрафакт маҳсулотлар айланмасининг олдини олиш, тадбиркорлар ўртасида ҳалол рақобатни таъминлаш, истеъмолчиларни контрафакт маҳсулотлардан огоҳ этиш, интеллектуал мулк объектларидан ноқонуний фойдаланганлик учун қонуний жавобгарликни кучайтиришдан иборат.
Меморандум доирасида “DARVOZA SAVDO” МЧЖ ўз савдо мажмуаларига маҳсулотларни сотувга чиқаришдан олдин Агентлик мутахассисларининг контрафакт ёки контрафакт эмаслиги бўйича фикрини олган ҳолда сотувга таклиф этади.
Шунингдек, Агентлик, “DARVOZA SAVDO” МЧЖнинг маҳсулотларни сотувга таклиф этишдан олдин дастлабки кўрикдан ўтказиш фаолияти билан шуғулланувчи ходимларини соҳага оид билим ва кўникмаларини ошириш бўйича ўқув курслар, давра суҳбатлар, семинар-тренинглар ўтказиш ишларини ташкил этади.
Бундан ташқари, Агентлик вақти-вақти билан “DARVOZA SAVDO” МЧЖга қарашли савдо мажмуаларида кузатув ишларини олиб боради ва аниқланган контрафакт маҳсулотлар ҳақида “DARVOZA SAVDO” МЧЖга билдирги киритади “DARVOZA SAVDO” МЧЖ эса, ушбу контрафакт маҳсулотларни тез фурсатларда савдодан олиб ташлаш чорасини кўради.
Агентликнинг контрафакт маҳсулотлар савдосининг олдини олиш йўлида олиб бораётган ташаббусига ўзига ишонган тадбиркорлар ҳамкорликка қўшилиши ва бу борада ўз таклифларини билдириши мумкин. Сабаби ушбу ташаббус ҳалол тадбиркорлик фаолиятини олиб бораётган тараф манфаатлари учун хизмат қилади.
Агентлик лойиҳа орқали барча ишлаб чиқариш билан шуғулланаётган ҳалол тадбиркорларни ҳамкорликка чақириб, ўз маҳсулотларининг контрафакт нусхасига дуч келган тақдирда Интеллектуал мулк агентлигининг (71) 232-50-65 ишонч телефонлари ҳамда @ima_monitoring_bot телеграмм боти орқали хабар беришлари мумкин.
Эслатиб ўтамиз, илгари Интеллектуал мулк агентлиги бу каби ҳамкорлик меморандумини Korzinka.uz ҳамда Havas супермаркетлар тармоғи билан ҳам имзолаган ва ҳозирда томонлар келишуви асосида биргаликда ишлари давом этмоқда.
