Ҳаёт тарзи тез ўзгариб бораётган бўлсада, биз эски хизматлар учун ҳақ тўлашда давом этмоқдамиз. Дейлик, ҳозирги пайтда кўпчилик сунъий йўлдош телевидениясидан фойдаланади. Умуман телевизор кўрмайдиганлар сони ҳам тобора ортиб бормоқда. Зеро, гаджет ёки ноутбуклар орқали исталган жойда онлайн твга уланиш имкони мавжуд. Шунга қарамай, анъанавий телевизион антенна учун пул тўлашда давом этаверамиз. Тўғри, бундай хизматлар арзон. Лекин бу коммунал хизматлар учун тўловларни камайтиришда яхшигина аҳамиятга эга. Бежизга, ота-боболаримиз: “Тома-тома кўл бўлур ”- дейишмайди.
Ҳисоблагичларни ўрнатинг
Ҳисоблагичларни ўрнатиш чўнтакка фойда ёки зарар эканлиги анчагина тортишувларга сабаб бўлган. Келинг, соддароқ тушинтирамиз. Агар сизнинг квартирангизда сув ҳисоблагичларини ўрнатиш техник жиҳатдан мумкин бўлсаю, лекин сиз буни амалга оширмаган бўлсангиз, акс ҳолда сув учун тўловни 1,5 га кўпайтирасиз.
Бу кун давомида ишлатишингиз мумкин бўлган сув сарфининг ўртача 5-6 баробарига тенг. Айниқса, кун давомида ишда ёки ўқишда бўладиганлар, хизмат сафарларида юрадиганлар учун бу мақсадсиз харажатга айланади. Иқтисодчиларнинг фикрича, ҳисоблагич ўрнатиш оила бюджети учун анча фойдали.
Қўшимча одамлар учун пул тўламанг
Кўплаб хизматлар квартирада рўйхатдан ўтган одамлар сонига қараб тўланади. Сизнинг хонадонингизда рўйхатдан ўтган, аммо бошқа маконда яшовчилар бўлса, уларни қонуний йўл билан турар жойига расмийлаштириш керак. Зеро, бир одам учун икки обьектда ҳақ тўланиши нотўғри.
Квитанцияларни текширинг
Биз ҳар доим ҳам аҳамият бермайдиган бу усул квартирада ўрнатилган барча энергия тежайдиган технологияларданда самаралироқ. Бу- шунчаки кўп пул тўламаслик орқали пулни тежаш демакдир.
Эътиборли бўлинг, битта хизмат учун икки марта пул ундиришга ҳаракат қилувчи, соҳта пул йиғувчилар домига илиниб қолманг. Қайси хизмат учун ҳақ тўлаётганингизни, сарф этган ресурс ҳажми тўлаётган пулингизга мутаносиб эканлигини назорат қилинг. Агар қандайдир шубҳали ҳолатларга дуч келсангиз, тегишли жойларга мурожаат қилишингиз мумкин. Унутманг, ўз ҳуқуқларимизни билмаслик ва эътиборсизлигимиз анча қимматга тушиши мумкин.
