Мадримов супер ярим ўрта вазн тоифасида бу сафар WBC Интерим чемпиони, америкалик Вержил Ортис ЖР га қарши жанг қилди.
12 раунд тўлиқ давом этган чемпионлик жангининг 5-раундигача Мадримов устунликка эришди. Бу, ҳакамлар томонидан ҳам эътироф этилди. Бироқ 6-раунддан бошлаб океан орти боксчисига омад кулиб боқа бошлади. Бошқача айтганда, Исроилнинг ўтган йили декабрь ойида касалликка чалиниб, тўлиқ тузалмагани панд берди. Виржил Ортис ҳакамларнинг якдил қарори билан 117-111, 115-113, 115-113 ҳисобда ғалаба қозонди ва чемпионлик камарини ўзида сақлаб қолди.
Жангдан сўнг журналистларга интервью берган ҳамюртимиз Мадримов баҳснинг 12 раунд давом этгани, ҳисобдаги фарқлар у қадар катта эмаслиги, саломатлигидаги муаммолар хусусида тўхталди ва ушбу учрашув келгуси жанглар учун катта сабоқ бўлганини таъкидлади.
