Бу ҳақда 26 февраль, пайшанба куни кечқурун Вашингтон ва Теҳрон делегациялари ўртасида воситачилик қилаётган Ўмон вакиллари эълон қилишди.
“Биз кунни АҚШ ва Эрон ўртасидаги музокараларда сезиларли ютуқларга эришган ҳолда ўтказдик”, деб таъкидлади Ўмон ташқи ишлар вазири Бадр ал-Бусаиди. Шунингдек, у келаси ҳафта Венада “техник даражадаги” музокараларнинг янги босқичи бўлиб ўтишини қўшимча қилди.
АҚШ делегацияси таркибидан Дональд Трампнинг махсус вакили Стивен Уиткофф ва АҚШ Президентининг куёви Жаред Кушнер ўрин олган. Учрашувда Эрон номидан мамлакат ташқи ишлар вазири Аббос Арагчи вакил бўлди.
Axiosнинг хабар беришича, томонлар 26 февраль куни эрталаб ва кечқурун иккита сессияда музокаралар олиб боришган. Нашрнинг хабар беришича, эрталабки учрашувдан кейин Америка делегациясининг “ҳафсаласини пир бўлган”, аммо Уиткофф ва Кушнер кечки сессияни “ижобий” деб таърифлашди.
Эрон ядровий иншоотларни демонтаж қилишдан бош тортмоқда
Қатарнинг Ал-Жазира телекомпаниясига кўра, эрталабки учрашувда Эрон АҚШ билан ядровий келишув лойиҳасини тақдим этди. Нашр манбалари Теҳрон фақат уранни бойитишни вақтинча тўхтатишга тайёрлигини ва ядровий иншоотларини демонтаж қилишдан бош тортаётганини айтишмоқда. Эрон расмийлари уран захираларини паст даражага туширишга ва МАГАТЭ вакилларига ядровий иншоотларга киришга рухсат беришга тайёр.
CNN мухбири Эрон делегациясига яқин манбаларга таяниб, Эрон фақат барча АҚШ санкциялари ва БМТ Хавфсизлик Кенгаши резолюциялари бекор қилинган тақдирдагина АҚШ билан келишувга рози бўлишга тайёрлигини айтди. Аввалроқ, мамлакат ташқи ишлар вазирининг ўринбосари Мажид Тахт-Раванчи ҳам шунга ўхшаш баёнот берган эди, деб хабар берди dw.com.
