Хусусан, Ўзбекистон республикаси Маданият вазирлиги томонидан халқимиз маънавиятини бойитиш, одамларимизга пандемия даврида кўтаринкилик улашиш борасида олиб борилаётган тизимли ишлар бунинг далилидир. Театрлар фаолиятининг такомиллаштирилаётгани, айниқса, вилоятлардаги қўғирчоқ театрларининг замонавий кўриниш касб этаётгани ана шу эзгу ишлар натижасидир.
Ана шундай саъй-ҳаракатлар туфайли эндиликда жиззахлик болажонлар ҳам тамомила янги, энг сўнгги қиёфадаги қўғирчоқ театри биносида спектакль томоша қиладилар.
Театр биносининг очилиш маросимида Маданият вазири Озодбек Назарбеков ҳамда вилоят ҳокими Эргаш Салиев қатнашди.
Жаҳон стандартлари талабига жавоб берадиган, энг сара бўёқларда акс этган ажойиб лавҳалар театрга киришданоқ инсон қалбига болаларча беғуборлик олиб киради. Шунингдек, қўғирчоқ театри музейи ҳам турли тарихий қўғирчоқлар экспонати билан безатилган, шу билан девордаги лавҳалар сизни эртаклар оламига беихтиёр етаклайди.
— 1983 йилда ташкил этилган театримиз ниҳоят, бугунга келиб, чинакам қўғирчоқ театрига хос бинога эга бўлди, — дейди театр раҳбари Ғулом Даурхонов.
— Ҳукуматимизга минг раҳмат, 14 миллиардга яқин маблағ ажратди. Шу билан бирга вилоят ҳокимлигининг 1 миллиард 300 минг сўмлик маблағи ҳам бинони энг сўнги дизайнда безаш ишларига сарфланди. Насиб қилса, янги бинода янги куч, янги шижоат билан репертуарларимизни янада бойитамиз.
Очилиш маросимига ўз совғалари билан ташриф буюрган меҳмон театрлар, жумладан, Самарқанд вилояти қўғирчоқ театри томонидан намойиш этилган чиқишлар барчага бирдек манзур бўлди.
Муножат МЎМИНОВА,
«Янги Ўзбекистон» мухбири
