Жаҳон соғлиқни сақлаш ташкилоти (ЖССТ), мумкин бўлган ижтимоий ва иқтисодий оқибатлари туфайли COVID-19 тарқалишини тўхтатиш учун давлатларни қайта карантиндан воз кечишга чақирмоқда. Бу ҳақда The Daily Telegraph нашрига берган интервьюсида ЖССТнинг фавқулодда касалликлар бўлимининг раҳбари, эпидемиолог Мария Ван Керкхове маълум қилди.
ЖССТ вакилининг сўзларига кўра, карантин "коронавирус" тарқалишининг олдини олиш воситаси сифатида "маҳаллийлаштирилган стратегиялар" билан алмаштирилиши керак.
Шу билан бирга, эпидемиолог томонидан, март ойи охирида 100 дан ортиқ мамлакатларда жорий қилинган карантин коронавирус билан курашиш учун зарур бўлган соғлиқни сақлаш инфратузилмасини яратиш учун вақтдан ютган чора сифатида кўрилди.
Шунга қарамай, Керкхове карантиннинг иқтисодий, ижтимоий ва тиббий харажатлари "улкан" эканлигини таъкидлади.
"Жаҳон соғлиқни сақлаш ташкилоти карантин жорий этишни тавсия этмайди, аммо шу каби чорани касалликнинг тарқалиш тезлиги туфайли бир қатор мамлакатларда қўллаш керак. Аммо, биз умид қиламизки, мамлакатлар уни қайтадан киритиши шарт эмас", - дея унинг сўзларини келтиради ИноТВ.
Мутахассис, шунингдек, кейинги олти ой ичида "хавфсиз ва самарали" вакцина яратилишига умид қилмаслик керак деган фикрни билдирди. Бунинг ўрнига Керкхове давлатларни янги авж олган ҳолатларда "мослаштирилган, чекланган, маҳаллийлаштирилган" ёндашувни қўллаш учун мавжуд воситалардан фойдаланишга чақирди.
"Бу йўналишдаги илмий ишларнинг тезлиги ноодатий эди ... энди бизда касалликнинг юқишини олдини олиш ва ҳаётни сақлаб қолиш учун воситалар мавжуд", деди эпидемиолог. У контактларни қидириш, кенг кўламли синовлар, тиббий муассасаларни жиҳозлаш, ижтимоий масофа ва ниқоб тақиш каби чораларни айтиб ўтди.
Керкхове ушбу чораларнинг барчасини биргаликда ишлатиш кераклигини таъкидлади. Бу ҳукуматларга ўз мамлакатларида коронавирус тарқалишини назорат қилишга ёрдам беради.
