— Камқонлик кўплаб тана аъзолари фаолиятига салбий таъсир этиши билан хавфлидир. Биринчи кўринадиган белгилар терида пайдо бўлиб, у оқариб кетади. Тирноқлар ва сочлар мўртлашиб, ёрқинлигини йўқотади. Шунингдек, тил яллиғланиши, оғиз атрофида юзаки яралар пайдо бўлиши мумкин. Асаб тизими фаолияти бузилиб, тез-тез бош айланиши, оғриши, қулоқларда шовқин кузатилади. 1 ёшгача бўлган ва оғир камқонликка чалинган гўдаклар ривожланишда анча ортда қолади.
Қолаверса, уйқучанлик, тез-тез асабийлашиш, доимий чарчоқ, бўр ёки кесак ейиш ҳам камқонликнинг типик белгиларидир. Хасталикнинг оғир ҳолатларида эса болаларда юрак-қон томир тизими фаолияти бузилиб, улар ҳушидан кетиши, тахикардия, нафас қисиши кузатилади.
— Камқонликка қандай ташхис қўйилади?
— Касалликка ташхис қўйишда, аввало, педиатр-шифокор кўригидан ўтиш лозим. Қолаверса, болада анемияни аниқлаш учун гастроэнтеролог, нефролог, аллерголог, гематолог ва бошқа тор доирадаги мутахассислар текшируви талаб этилади.
Шунингдек, шифокор томонидан умумий қон таҳлиллари, хусусан, ундаги эритроцитлар ва гемоглобин кўрсаткичларини аниқлаш учун лаборатор таҳлиллар буюрилади.
— Касаллик қандай даволанади?
— Ёш болалар, мактаб ёшидаги ўғил-қизларда, аввало, таомнома ва кунлик тартибни қайта кўриб чиқиш лозим. Жумладан, бемор бола кўп вақт тоза ҳавода сайр қилиши, ҳаракатлантирувчи ўйинлар ўйнаши, яъни ўртача жисмоний фаолият билан машғул бўлиши, бир вақтда ухлашга ётиб, бир вақтда уйғониши талаб этилади.
Бундан ташқари, анемияга чалинган болалар рационида темирга бой маҳсулотлар – қизил гўшт, ловия, нўхат, қорабуғдой унидан тайёрланган нон, какао, денгиз карами, қўзиқорин, қуритилган мевалар, қуритилган ўрик, кўкатлар бўлиши керак. Шу билан бирга, С ва B12 витаминларига бой маҳсулотлар (булғор қалампири, брокколи, цитрус мевалар, балиқ, яшил баргли сабзавотлар) ҳам касалликнинг олдини олишда жуда муҳим. Сабаби ушбу витаминларсиз темир қонга сўрилмайди.
Агар болада жиддий камқонлик кузатилса, шифокор томонидан зарур дори-дармонлар тайинланади.
Мутахассиси билан суҳбатни Соғлиқни сақлаш вазирлиги матбуот хизмати олиб борди.
