UPS авиакомпаниясининг MD-11 юк самолётининг ҳалокати ва ундан кейин юз берган ёнғин оқибатида ҳалок бўлганлар сони етти нафарга етди, деб хабар берди Кентукки губернатори Энди Бешер.
“Ҳалок бўлганлар сони камида етти нафарга етди ва бу рақам ошиши кутилмоқда. Фавқулодда вазиятлар хизмати ходимлари воқеа жойида, ёнғинни ўчириш ва терговни давом эттириш учун астойдил ишламоқда”, деб ёзди у ўзининг X саҳифасида.
Юк самолёти Кентукки штатининг Луисвилл шаҳридаги Муҳаммад Али халқаро аэропорти яқинида ҳалокатга учради. CNN ва FlightRadar24 хабарларига кўра, ҳалокат самолёт Луисвиллдан Гонолулуга йўл олаётган пайтда парвоздан кўп ўтмай содир бўлган. Бортда уч нафар экипаж аъзоси бўлган.
Ҳалокат катта майдонни қамраб олган кучли ёнғинга сабаб бўлган. Расмийлар Грейд-лейн кўчасини ёпиб, 8 километр радиусдаги аҳолини вақтинча эвакуация қилишди. CBS News WLKY вертолётидан олинган видеолавҳаларга таяниб, бортдаги ёнилғига тўла бакнинг катта ёнғинга сабаб бўлган бўлиши мумкинлигини тахмин қилмоқда. Ҳалокатнинг расмий сабаби ҳали аниқланмаган.
2976-рейси Дэниел К. номидаги Гонолулу халқаро аэропортига йўл олган эди. Бортда уч нафар экипаж аъзоси бўлган. Дастлабки маълумотларга кўра, камида уч киши ҳалок бўлган ва яна 11 киши жароҳатланган.
McDonnell Douglas MD-11 – бу дастлаб McDonnell Douglas компанияси томонидан ишлаб чиқарилган ва кейинчалик Boeingга ўтказилган юк самолёти. У FedEx Express, Lufthansa Cargo ва UPS Airlines авиакомпаниялари томонидан юкларни ташиш учун кенг тарзда фойдаланилади, деб хабар берди rbc.ru.
