«Ўзбекгидроэнерго» АЖ Бошқаруви раиси томонидан ҳам ходимлар ва уларнинг фарзандлари тафаккури, маънавий олами ва билим-заковатини ошириш мақсадида китобхонлик тарғиботи ҳар томонлама қўллаб-қувватланмоқда.
Бугун, 12 август куни «Ўзбекгидроэнерго» АЖ маъмурий биноси ҳудудида «Ўзбекистон» нашриёт-матбаа ижодий уюшмаси билан ҳамкорликда навбатдаги китоблар ярмаркаси ташкил этилди.
Ушбу китоб савдоси ярмаркасида Жамият ижро аппарати ҳамда тизим корхона ва ташкилотларининг ходимлари эътиборига мамлакатимизнинг етакчи босма нашриётлари томонидан чоп этилаётган турли йўналишлардаги кенг кўламли адабиётлар, болажонлар учун ранг-баранг ва қизиқарли китоблар тақдим этилди.
Айтиш лозимки, китоб энг яқин дўст, энг содиқ ҳамроҳ, билим ва тафаккур манбаи, ёлғизликда ва ғамли онларда мунис улфатдир. Маърифатли ва маънавиятли инсонлар эса ҳақиқий ватанпарвар, юртпарвар ҳамда ўз соҳасининг етук вакили сифатида ўз Ватани тараққиётига бор куч ва иродасини бахшида этиб, келажак авлодлар тарбиясига камарбаста ҳамда ҳақиқий намуна бўлиб, уни кўз қорачиғидай асраб-авайлашда муҳим вазифани бажарадилар.
Ахборот хизмати
