Конимех туманида ғалла бу йил 10 кунда ўрилиб, йиғиштириб олинди. Албатта, бунда туман ғаллакорлари машина трактор паркининг анча кенгайганлиги, техникалардан самарали фойдаланиш йўлга қўйилганлигини, юқори унумли комбайн сотиб олинганлигини алоҳида таъкидламоқ жоиз. Бундан ташқари, имтиёзли кредитлаш тизими деҳқонларимизнинг молиявий масалаларда ташвишлардан халос этди. Мана шундай рағбат ҳамда унга муносиб меҳнат йилдан йилга ҳосилдорликнинг ортиши кўринишида кўзга ташланяпти.
Навоий вилоят ҳокимининг конимехлик ғаллакорларига табригида шундай дейилади: «Шартнома лафз - орият устун. Мамлакатимизда ғалла мустақиллиги йўлида олиб борилган изчил саъй -ҳаракатлар самараси ўлароқ бой тажриба тўпланиб, дала деҳқончилик ишларининг беназир тизими яратилди. Ғалла зироатчилигида илмий ёндашув, селекция ишларининг энг замонавий технологияларга асосланган тизими жорий этилди. Табиийки бу етиштирилаётган доннинг сифати ва истеъмол хусусиятларида ўзининг ижобий самарасини беряпти».
Шунингдек, табрикда эришилган ғалаба биринчи навбатда, серҳосил буғдой навларини яратишга қаратилган селекция масалаларининг чуқур таҳлил этилгани, ерга, ҳудудлар иқлимига мос уруғларни танлаш бўйича кўрилган зарур чора-тадбирлар самараси эканлиги таъкидланди.
Соҳага эътибор туфайли йил сайин рентабеллик ортиб, фермерларнинг даромадига даромад қўшилиб бормоқда. Конимех туман деҳқонларнинг фақатгина бошоқли дондан олган соф фойдаси 2020 йилда 13,6 миллиард сўмни ташкил этган бўлса, бу йилги кўрсатгич 16,2 миллиард сўмга етиши кутиляпти.
Вилоятнинг ғалла хирмонида Конимех тумани ғаллакорларининг ҳиссаси 3,3 минг тоннани ташкил этади. Туманда дон етиштириш шунчаки тирикчилик манбаи ёхуд кишиларнинг ризқигина эмас, балки элнинг ғурури, керак бўлса маънавий бойлигига айланган. Юртда кечган ғалла мустақиллиги сиёсати улар ғайратига-ғайрат қўшиш билан бирга кенг кўламдаги бунёдкорлик, ободонлаштириш ишларига, турмуш тарзининг гўзаллашувига замин яратди.
Бугун қабул масканлари донга тўлмоқда. «Дон маҳсулотлари» корхоналарида бораётган янгиланиш, модернизация тадбирлари ҳамда уларнинг самараларини эътироф этмай иложимиз йўқ. Вилоятнинг ун ишлаб чиқаришга ихтисослашган ўз дастгоҳларини тубдан янгилаган корхоналарида автоматлаштирилган технологиялар жорий этилди. Эндиликда хом-ашё ва жараёнлар марказий назоратда. Натижада «Навоий уни» ўз брендига эга бўлди, деб хабар беради Навоий вилоят ҳокимлиги матбуот хизмати.
