Дунёда коронавирус билан боғлиқ эпидемиологик вазият таранглигича қолмоқда. Янги омикрон штаммининг кенг тарқалиши турли хавотирларни келтириб чиқараётир.  Гарчи, у эмланганлар учун оддий респиратор вирусли инфекциядек енгил кечаётган бўлса-да, эмланмаганлар учун оғир асорат ва оқибатлари билан таҳдид солади.

Эпидемиологик вазиятни яхшилаш, аҳоли саломатлигини ҳар томонлама ҳимоя қилиш учун барча чоралар кўрилаётганига қарамай, сўнгги кунларда мамлакатимизда ҳам коронавирусга чалиниш ҳолати кескин ошди. Олиб борилаётган таҳлилларга асосан, беморларнинг 13,5-14 фоизи махсус юқумли касалликлар шифохоналарида, 85,5 фоизи эса уйда даволанмоқда. Бу эса, ўз навбатида, даволаш-профилактика муассасаларининг бирламчи бўғини (оилавий поликлиникалар)ни кучли босим остига қўяди.

Омикрон бошқа штаммлардан юқувчанлиги, одамдан одамга тез ўтиши билан фарқланади. Аммо гап шундаки, бу респиратор инфекция ҳали ҳам иммунитети заиф одамларда турли аъзо ва тизимларга жиддий зарар етказиши, шунингдек, ўлимга олиб келиши билан хавфли. Шу боис, мутахассислар ўз саломатлигимизга ўзимиз масъул бўлишимиз, эмланиш хавфли касалликдан ҳимояланишнинг ягона чораси эканини тушунишимиз, қолаверса, карантин қоидаларига қатъий амал қилиш орқали инфекцияга чалинишнинг олдини олишимиз мумкинлигини бот-бот такрорламоқда. Аммо огоҳлантириш ва тушунтириш ишларига қарамай, жойларда карантин қоидалари бузилаётгани ҳам бор гап. Шу сабабли бутун халқимиз ҳаётига хавф солаётган бундай ишларга нисбатан кескин чора кўрилишини вазиятнинг ўзи тақозо этмоқда.

Жумладан, Тошкент шаҳрининг 12 та туманида биттадан махсус COVID поликлиникалари фаолияти йўлга қўйилди. Улар рентген, кислород конденсаторлари, ПЗР тест ва коронавирусга қарши зарур дори-дармонлар, сарфлов материаллари, дезинфекцияловчи эритмалар билан таъминланган. ПЗР тестлар ҳар куни 24 соат давомида топширилиши мумкин. Санитария-эпидемиологик осойишталик ва жамоат саломатлиги хизматининг Тошкент шаҳри бошқармаси, ҳар бир туман бўлимларида ҳам шундай имкониятлар яратилди.

Эмлаш организмда маълум хотира ҳужайралари пайдо бўлиши орқали мослашувчан иммунитет реакциясини рағбатлантиради. Вакцина танада касалликка қарши иммунитет ишлаб чиқишга кўмак берувчи хавфсиз ва самарали биологик восита саналади.

COVID-19 га қарши эмлаш пандемияни жиловлашга ёрдам беради. Айни пайтда қўлланаётган вакциналар янги штаммга нисбатан ҳам самарали экани айтилмоқда. Ўрганишлар натижасида шифохоналарга оғир аҳволда келтирилаётган беморларнинг аксарияти эмланмаганлар орасида учраётгани аён бўлмоқда. Тўғри, эмланганлар орасида ҳам касалликка чалинганлар бор, аммо уларда касаллик енгил кечаётир.

Айни кунларда пойтахтимиздаги барча оилавий поликлиникаларда коронавирус инфекциясининг олдини олиш мақсадида етти турдаги вакцина билан эмлаш ишлари олиб борилмоқда.

Санитария-эпидемиологик осойишталик ва жамоат саломатлиги хизмати Тошкент шаҳри бошқармаси ҳамда ҳудудий бўлимлари ходимлари томонидан қатор чора-тадбирлар кўрилмоқда. Жумладан, касалликнинг олдини олиш мақсадида аҳоли гавжум жойлар ва савдо нуқталарида тушунтириш ишлари олиб борилиши баробарида камчиликларни бартараф этиш юзасидан ҳам чоралар кўрилмоқда.

Ўзбекистон Республикасига коронавируснинг кириб келиши ва тарқалишининг олдини олиш чора-тадбирлар дастурини тайёрлаш бўйича Республика махсус комиссиясининг 78-сонли йиғилиш баёнида давлат органлари, хўжалик юритувчи субъектлар ва бошқа ташкилотларнинг ходимлари (саломатлиги бўйича қарши кўрсатма бўлган ходимлар бундан муст асно) 2021 йил 1 сентябрга қадар коронавирус инфекциясига қарши вакцинанинг камида 1-дозаси, 1 октябрга қадар 2-дозаси, 1 ноябрга қадар 3-дозаси билан эмланмаган тақдирда, мазкур ташкилотлар (объектлар)нинг фаолият юритиши вақтинчалик тўхтатилиши таъкидланган.

Шу нуқтаи назардан, пойтахтимиздаги 6 849 та объектда, жумладан, 1972 та бюджет ташкилот ҳамда 4877 та тадбиркорлик субъектида ўрганиш ишлари олиб борилди. 11 596 та бюджет ташкилот ва 7835 та тадбиркорлик субъектининг 19 431 нафар ходими коронавирус инфекциясига қарши эмланмагани аниқланди. Натижада 5524 нафар ишчи-ходим вақтинчалик ишдан четлатилди, 108 та бюджет ташкилот раҳбарларига нисбатан маъмурий баённомалар расмийлаштириб, жаримага тортилди. Мавжуд камчиликларни бартараф этиш учун 38 та объект фаолияти вақтинча тўхтатилди. 64 та тадбиркорлик субъекти бир неча бор берилган тавсияларга амал қилмагани учун Тошкент шаҳри тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девонини хабардор қилиб текширилди ҳамда чора кўриш учун 58 та тадбиркорлик субъектига доир ишлар жиноят ишлари бўйича ҳудудий судларга юборилди.

Жорий йил 24 - январдан бошлаб Республика махсус комиссиясининг 77-, 78-, 92-сонли йиғилиш баёни ижросини таъминлаш ва карантин қоидаларига қатъий риоя қилиш учун 943 та тадбиркорлик субъекти раҳбарларига расман огоҳлантириш хати берилиб, улардан кафолат хати олинди.

Санитария-эпидемиологик осойишталик ва жамоат саломатлиги хизмати Тошкент шаҳри бошқармасининг туман бўлимлари ходимлари томонидан коронавирус инфекциясининг янги тури шаҳар ҳудудига кириб келиши ва тарқалишининг олдини олиш бўйича туну кун навбатчилик асосида профилактик ва эпидемияга қарши тадбирлар давом этмоқда.

Юртдошларимиз эса ниқоб тақиш, ижтимоий масофа сақлаш, жамоат жойларга боришдан тийилиш, антисептик воситалардан фойдаланиш каби талаб ва қоидаларга амал қилиш, энг муҳими, эмланиш орқали аввало, ўзини, оиласи ва яқинларини ушбу хавфли касалликдан ҳимоя қилган бўлади.