Мамлакатимизда коррупциянинг олдини олиш ва унга қарши муросасиз курашишнинг илғор халқаро стандартларга асосланган тизимини жорий этиш бўйича изчил чоралар кўрилмоқда. Жумладан, давлатимиз раҳбарининг 2021 йил 6 июлдаги қарорига асосан, давлат ҳокимияти органлари ва йирик хўжалик юритувчи субъектларда коррупция ҳолатларини барвақт аниқлаш ва олдини олиш, уларнинг сабаб ва шарт-шароитларини бартараф этиш, манфаатлар тўқнашувига йўл қўймаслик ҳамда коррупцияга нисбатан муросасиз муносабатни шакллантириш чораларини кўриш учун масъул бўлган коррупцияга қарши ички назорат тузилмалари фаолияти йўлга қўйилмоқда.
Коррупцияга қарши курашиш агентлиги мазкур тузилмаларни жорий этиш ва самарали фаолият юритишини ташкиллаштириш вазифасини амалга ошириб келмоқда. Хусусан, ушбу семинар-тренинг орқали ҳам назорат тузилмалари фаолиятига амалий ёрдам бериш кўзда тутилган.
Ҳозирда 91 та давлат ташкилотларида алоҳида штат бирликлари доирасида коррупцияга қарши ички назорат тузилмалари фаолияти йўлга қўйилди. Мазкур тузилмалар мустақиллигини таъминлаш мақсадида Агентлик томонидан Адлия вазирлиги билан биргаликда Коррупцияга қарши ички назорат тузилмалари фаолияти тўғрисидаги намунавий низом тасдиқланди.
Унга кўра, назорат тузилмалари ҳамда уларнинг ходимларига низом ва бошқа қонунчилик ҳужжатларида назарда тутилмаган функцияларнинг юклатилишига йўл қўйилмайди. Яъни, ушбу тузилмани турли тадбирларга жалб қилиш, вазифасига кирмаган мажбуриятларни унинг зиммасига юклаш қатъиян тақиқланади. Айни талабнинг давлат органлари ва ташкилотлари раҳбарлари томонидан бажарилишини Агентлик қаътий назорат қилиб боради.
Тузилмалар фаолиятини методологик таъминлаш мақсадида Агентлик томонидан БМТ тараққиёт дастури ва “KPMG” экспертлари кўмагида қатор ҳужжатлар тўплами ишлаб чиқилиб, барча ташкилотларга етказилди. Коррупцияга қарши курашиш сиёсати, манфааатлар тўқнашувини бошқариш ҳақида низом, коррупцияга қарши курашиш самарадорлигини мониторинг ва назорат қилиш услубиёти, rоррупциявий хавф-хатарларни аниқлаш ва баҳолаш услубиёти каби ҳужжатлар шулар жумласидандир.
Агентлик томонидан яқинда ўтказилган ўрганишлар натижаси аксарият давлат ташкилотларида коррупцияга қарши ички назорат тузилмалари фаолияти етарли даражада йўлга қўйилмаганлигини кўрсатди.
Семинарда БМТТД лойиҳаси ва “KPMG” ҳалқаро аудиторлик компанияси экспертлари иштирок этиб, ўз маърузаларида бевосита Агентлик томонидан ўтказилган ўрганишлар натижасида аниқланган камчиликларни бартараф этиш ва тузилма ишини тўғри ташкил этиш масалаларига алоҳида урғу берди.
Семинар-тренингнинг ишида навбатдаги муҳим масала коррупцияга қарши курашиш ишларининг самарадорлигини рейтинг баҳолаш тизимини амалиётга татбиқ этиш мавзусига бағишланди. Таъкидланганидек, Ўзбекистон Республикаси Президентининг 2022 йил 12 январдаги “Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида”ги қарорига асосан, Коррупцияга қарши курашиш ишларининг самарадорлигини рейтинг баҳолаш тизими жорий этилмоқда.
Эътиборлиси, рейтинг баҳолаш Агентлик томонидан «E-Anticor.uz» электрон платформаси орқали ташкил этилади. Бунда коррупцияга қарши курашиш ишларининг самарадорлиги 0 баллдан 100 баллгача рейтингда баҳоланиб, фаолият самарадорлиги «яхши», «қониқарли» ва «қониқарсиз» тоифаларга ажратилади.
Рейтинг баҳолаш тизими дастлаб эксперимент тариқасида ўз фаолиятида коррупцияга қарши менежмент тизимини жорий этаётган 24 та вазирлик ва идоралар, маҳаллий ҳокимликлар фаолиятига, 2022 йил 1 июлдан бошлаб эса барча давлат ташкилотлари фаолиятига татбиқ этилиши белгиланган.
Эксперимент якунига кўра, E-anticor.uz электрон платформани такомиллаштириш ва модернизация қилиш чоралари кўрилади.
Электрон платформа БМТТД Ўзбекистондаги ваколатхонаси билан ҳамкорликда БМТ Тараққиёт дастурининг Сеул сиёсат маркази ҳамда Корея Республикасининг Коррупцияга қарши курашиш ва фуқаролик ҳуқуқлари бўйича комиссиясининг техник ва маслаҳат кўмагида ишлаб чиқилган. Семинар-тренингда ушбу марказ маслаҳатчиси Джунго Сонни ҳам иштирок этиб, Корея Республикасининг Коррупцияга қарши курашиш ташаббусларни баҳолаш тизими ҳақида атрофлича маълумот берди.
Семинар давомида иштирокчилар “E-anticor.uz” электрон платформасида ишлаш тартиби билан батафсил таништирилди. Айтиш жоиз, фойдаланувчиларга қулайлик яратиш мақсадида Агентлик томонидан бу бўйича махсус қўлланма ва видеоқўлланма тайёрланган бўлиб, улар электрон платформада жойлаштирилган.
Коррупцияга қарши курашиш агентлиги
ахборот хизмати
