Наврўз арафаси юртимизга ташриф буюрган Россиянинг «Культура» телеканали бир гуруҳ ижодкорлари «Ўзбеккино» Миллий агентлиги билан ҳамкорликда "Ўзбекистон: Янгиланиш" ҳужжатли фильми устида иш бошлашди.
Мазкур фильм ўзбек халқининг миллий урф-одатлари, қадриятлари ва асрлар оша шаклланиб келаётган маданияти ҳақида ҳикоя қилади.
Фильм ижодкорлари пойтахтнинг айрим жойларида суратга олиш ишларини ўтказиб, айни дамда Фарғонада съёмка жараёнларини давом эттиришмоқда. Ижодий гуруҳ асосан, миллий тўқимачилик, анъанавий кулолчилик ҳамда ҳунармандчилик билан боғлиқ тасвирга олиш ишларини амалга оширишмоқда.
Айтиш жоизки, «Ўзбеккино» МА ҳамда россиялик киноижодкорлар билан ҳамкорликда яратилаётган фильмлар ўзбек миллий маданиятини дунёга тарғиб этишга муносиб ҳисса қўшади.
“Ўзбеккино” Миллий агентлиги Ахборот хизмати
