УЕФА ЕЧЛ чорак финал жавоб ўйинларидан сўнг ҳафтанинг энг яхши футболчисини эълон қилди. Сўров натижаларига кўра Испаниянинг “Реал” клуби ярим ҳимоячиси Лука Модрич шу номга сазавор бўлди. Хорватиялик ўйинчи “Челси”га қарши кечган ўйиннинг 80-дақиқасида Родригонинг голига ассистентлик қилди ва якунда жамоасининг ярим финалга йўлланма олишига ёрдам берди.
Шу ўринда таъкидлаш лозимки, 36 ёшли футболчининг қироллик клуби билан шартнома муддати бу йил тугайди ва у келишувни узайтиргани йўқ. Журналист Серхио Сантоснинг ёзишича, Модрич Италиянинг “Ювентус” ва Қатарнинг қайсидир клубидан яхши таклиф олган. Икки клуб ҳам унга икки йиллик шартнома таклиф қилмоқда.
Қайд этилишича, Модрич маоши камайтирилмаса “Реал” билан шартномасини яна бир йилга узайтириши ҳам мумкин.
Эслатиб ўтамиз, Модрич 2012 йилда “Тоттенҳэм”дан қироллик клуби сафига ўтиб, шундан буён “Реал” шарафини ҳимоя қилиб келмоқда.
