“Олмалиқ кон металлургия комбинати” АЖ республикамиздаги йирик саноат корхоналаридан бири саналади. Металл ишлаб чиқаришда етакчилардан бўлган мазкур корхонада бугунги кунда Маҳаллийлаштириш дастури ижроси бўйича кенг қамровли ишлар амалга оширилмоқда.
Жумладан, 2020 йилда 72 лойиҳа асосида 131,9 миллирд сўмлик, шунингдек, янги 23 та лойиҳа асосида 11,9 миллиард сўмлик маҳаллийлаштирилган маҳсулотлар ишлаб чиқарилиши режалаштирилган эди. Амалда эса юқори натажаларга эришилиб, режа кўрсаткичлари 119,1 фоизга бажарилди.
Яхши ғоя, ташаббуслар самарадорликка етаклайди. Ана шу йўлдан бораётган комбинат томонидан маҳаллий ишлаб чиқарувчи корхоналар ва тадбиркорлик субъектлари билан кооперация алоқаларини кенгайтириш мақсадида 2019 йилнинг октябрь ойида импорт ўтказилган маҳсулотлари ярмаркасига республикамизнинг барча ишлаб чиқарувчилари таклиф этилди. Жараёнда иштирокчиларга ҳар бир импорт маҳсулоти тўғрисида батафсил маълумот берилиб, олдиндан тайёрланган импорт маҳсулотлари каталоги тақдим этилди. Ярмарка давомида кўплаб маҳаллий корхоналар билан келишувларга эришилди, ўзаро ҳамкорлик алоқалари ўрнатилди. Натижада ўтган йили Ўзбекистон Республикасининг Электрон кооперация портали орқали режадагидек 200,0 миллиард сўмлик эмас, балки 302,3 миллиард сўмлик 2 543 та шартнома имзоланди.
Маҳаллийлаштирилган маҳсулотлар комбинатнинг Марказий таъмирлаш механика заводи, Нодир металлар ва қаттиқ қотишмалар ишлаб чиқариш бўйича илмий-ишлаб чиқариш бирлашмаси, Рух заводи каби корхоналарида ишлаб чиқарилмоқда. Улар пўлат ва чўян қуймаларидан тайёрланган эҳтиёт қисмлар, ностандарт қурилмалар, конвейер қурилмалари учун эҳтиёт қисмлар, ГРАТ ва ГРТ типдаги насослар учун эҳтиёт қисмлар, янчиш ва тегирмон ускуналари учун эҳтиёт қисмлар, маҳаллий хом ашёни чуқур қайта ишлаш натижасида олинган маҳсулотлар ва ҳар хил турдаги маҳсулотларни ўз ичига олади. Бу турдаги ускуналар комбинатнинг ички эҳтиёжи ҳамда республикамизда фаолият юритиб келаётган тоғ кон саноати корхоналари учун мўлжаллангани билан аҳамиятлидир.
Ҳозирги кунда республиканинг бир нечта корхоналари, шу жумладан, кичик ва ўрта бизнес тадбиркорлик субъектлари билан комбинат эҳтиёжлари учун фойдаланиладиган янги турдаги импорт ўрнини босувчи маҳсулотларни ишлаб чиқаришни йўлга қўйиш бўйича таклифлар берилган ва бу борада ишлар олиб борилмоқда.
Ўзбекистон Республикаси Фанлар Академияси билан ҳам ўзаро манфаатли алоқалара йўлга қўйилган. Жумладан, лаборатория шароитида олинган олеин кислотаси ишлаб чиқариш жараёнларида синаб кўрилиб, яхши натижаларга эришилди. Ҳозирда ушбу маҳсулотни саноат даражасида ишлаб чиқаришни йўлга қўйиш бўйича ишлар олиб борилмоқда. Шу билан биргаликда 2021 йилда Маҳаллийлаштириш дастури доирасида 161,4 миллиард сўмлик 87 та лойиҳа, шу жумладан, 4,3 миллиард сўмлик 17 та янги лойиҳа амалга оширилиши белгиланган.
Яқин истиқболда маҳаллийлаштириш жараёнларини чуқурлаштириш мақсадида комбинатнинг Марказий таъмирлаш-механика заводини модернизация қилиш ва бунинг натижасида технологик ускуналар учун ҳозирда импорт орқали сотиб олинаётган эҳтиёт қисмлар ва бутловчи буюмларни ушбу бўлинма қувватларида ишлаб чиқаришни йўлга қўйиш ҳамда Портловчи моддалар заводи қувватларида ноэлектрик қўзғатиш тизимларини ишлаб чиқаришга мўлжалланган қўшма корхонани ишга тушириш режалаштирилган.
“Олмалиқ кон металлургия комбинати” АЖ
ахборот хизмати
