Сўнгги йиллардаги хусусий секторлар сонининг ортишига замин яратувчи механизмларни ишлаб чиқиш, шунингдек, тадбиркорлик субъектлари фаолияти бардавом ва барқарор хусусиятларга эга бўлиши учун ҳукумат томонидан амалга оширилаётган реал чора-тадбирларни ҳаётимизнинг турли жабҳаларида учратишимиз мумкин.
Бу борада лицензиялаш ва рухсат бериш тизимини либераллаштириш ҳамда институционал ислоҳ қилишнинг янги босқичини бошлаш чин маънода замон талабига айланиб улгурди.
Ўзбекистон Республикаси Президентининг «Лицензиялаш ва рухсат бериш тартиб-таомилларини тубдан такомиллаштириш чора-тадбирлари тўғрисида»ги ПФ–6044-сон фармони фикримизнинг яққол исботидир.
Мазкур Фармон фуқаролар соғлиғига ҳамда жамиятга зиён етказмайдиган лицензия ва рухсат этиш хусусиятига эга ҳужжатларнинг айрим турларини қисқартириш, тадбиркорлик субъектларининг вақт ҳамда маблағлари сарфланишини камайтириш учун тартиб-таомилларни соддалаштириш, тегишли ҳужжатларни бериш жараёнларини тўлиқ рақамлаштириш орқали шаффофликни таъминлаш каби кечиктириб бўлмас чораларни амалиётга татбиқ этишни назарда тутган.
Унга мувофиқ, жорий йил 1 январдан бошлаб лицензиялаш, рухсат бериш ва хабардор қилиш тартиб-таомиллари босқичма-босқич тўлиқ электрон тарзда «Лицензия» ахборот тизими орқали амалга оширилади. Лицензия ва рухсат этиш хусусиятига эга ҳужжатларни олиш ҳамда ваколатли органни хабардор қилиш ҳақидаги аризалар ва уларга илова қилинган ҳужжатлар электрон шаклда Ягона интерактив давлат хизматлари порталидан фойдаланган ҳолда интернет тармоғи орқали қабул қилинади.
Шунингдек, барча турдаги лицензия ва рухсат этиш хусусиятига эга ҳужжатлар ҳамда хабарнома қабул қилинганлиги ва реестрга киритилганлик ҳақида хат уларнинг ҳаққонийлигини онлайн текшириш имконини берадиган QR-код қўйилган ҳолда расмийлаштирилади ва уларни махсус бланкаларда бериш тартиби бекор қилинади. Давлат хизматидан фойдаланишдаги бундай шаффофлик, очиқлик, интерактивлик ва амалдаги механизмни рақамлаштириш ортида мамлакатимиз тадбиркорларига енгиллик бериш кўзда тутилганига гувоҳ бўламиз.
Мазкур Фармонга илова сифатида лицензиялаш ва рухсат бериш тартиб-таомилларини акс эттирган рўйхатлар тасдиқланган бўлиб, улар орқали айрим лицензияланадиган фаолият ва рухсат этиш хусусиятига эга ҳужжатларнинг сони қисқаргани ёки лицензия олиш тартиб-таомилига ўзгартириш киритилгани маълум бўлади. Хусусан, 2021 йил 1 январдан бошлаб лицензияланадиган фаолият ва рухсат этиш хусусиятига эга ҳужжатларнинг хабардор қилиш тартиби жорий этилиши йўли билан бекор қилинадиган айрим турлари сифатида мактабдан ташқари таълим, кадрлар малакасини ошириш ва уларни қайта тайёрлаш, чет тилларни ўргатиш бўйича ўқув курсларини ташкил этиш, оилавий нодавлат мактабгача таълим муассасалари фаолияти ва бошқа қатор фаолият турлари белгиланди. Бу каби ислоҳот нафақат бу соҳадаги тадбиркорлик субъектлари учун манфаат келтиради, балки келажагимиз эгалари саналмиш ёшларнинг сифатли таълим олишига ҳамда етук ва рақобатбардош кадрлар сони ортишига замин яратади.
Юртимизда бўлаётган бундай ўзгаришлар кишини хурсанд қилади, албатта. Ўз навбатида, ҳукуматимиз томонидан яратилаётган бундай шарт-шароитларга бефарқ бўлмасдан имкониятлардан фойдаланишимиз ва юртимиз истиқболи учун муносиб ҳисса қўшмоғимиз даркор. Зеро, ёзилаётган қоидалар, имконият ва имтиёзлар ҳақиқий ҳаётимизга кўчиши амалда Сизу бизга боғлиқ!
Дилфуза Абдуллаева,
Тошкент давлат юридик университетининг
Ихтисослаштирилган филиали
Хусусий-ҳуқуқий фанлар кафедраси мудири в.б.
Сабина Баротова,
Тошкент давлат юридик университетининг
Ихтисослаштирилган филиали
2-курс талабаси, “CIVILIST” номли тўгарак аъзоси
