Унда Ўзбекистон Республикаси Энергетика вазири Ж.Мирзамаҳмудов, Қирғизистон Республикаси Энергетика вазири Т.Ибраев, Қозоғистон Республикаси Энергетика вазири Й.Аккенженов ва Қозоғистон сув хўжалиги ва ирригация вазири Н.Нуржигитов иштирок этди.

Шунингдек, Ўзбекистон Республикаси Сув хўжалиги вазири Ш.Хамраев ҳамда Тожикистон Республикаси Энергетика ва сув хўжалиги вазири Д.Жума видеоконференсалоқа шаклида иштирок этишди.

Музокаралар чоғида сўнгги йилларда дўст ва қардош давлатлар раҳбарлари ташаббуси билан йўлга қўйилган кўп томонлама ҳамкорлик барча йўналишларда, хусусан, ёқилғи-энергетика соҳасида изчил ва самарали ривожланаётгани алоҳида таъкидланди.

Йиғилишнинг асосий мақсади 2026–2027 йиллар вегетация даврида минтақадаги сув-энергетика тизимларининг барқарор ва келишилган иш режимини таъминлаш масалаларини муҳокама қилишдан иборат бўлди. Томонлар бу борада ҳамкорликни янада кучайтириш зарурлигини қайд этдилар.

Шу билан бирга, куз-қиш мавсумининг якунлари сарҳисоб қилиниб, энергетика юкламаларини мувозанатлаш ҳамда тизимларнинг узлуксиз ишлашини таъминлаш бўйича аниқ чора-тадбирлар кўриб чиқилди.

Учрашув якунида иштирокчилар келишилган режимларни амалга оширишни давом эттириш, тармоқлараро мувофиқлаштиришни мустаҳкамлаш ва минтақавий энергетика ҳамкорлигини чуқурлаштиришга келишиб олдилар.

Кейинги учрашувлар 2026 йил май ойида Тошкент шаҳрида ва июнь ойида Бишкек шаҳрида ўтказилиши белгиланди.