“Ўзбеккино” томонидан маълум қилинишича, у обрўли турк делегацияси таркибида Тошкентга келади ва ҳамкасблари билан бирга кинофестивалнинг асосий тадбирларида иштирок этади. Улар орасида 14 сентябрь куни бўлиб ўтадиган анжуманнинг очилиш маросими, шунингдек, 15 сентябрь куни пойтахтимиздаги Анжуманлар саройида тантанали равишда очиладиган “Туркия киноси кунлари” маданий тадбири ҳам бор.
Туркия делегацияси Тошкентда фильм намойишларини ўтказади, сўнгра 16 сентябрь куни Урганчга йўл олади ва у ерда икки кун давомида ўз фильмларини киномухлислар эътиборига ҳавола этади.
Эслатиб ўтамиз: Бурак Озчивит “Муҳташам юз йил”, “Қора муҳаббат” ва бошқа қатор сериаллар орқали мухлислар эътиборини қозонган.
Тошкент халқаро кинофестивали бош директори Фирдавс Абдуҳолиқов таъкидлаганидек, “Туркиялик машҳур актёрларнинг ташрифи кўп сонли кино мухлисларни хушнуд этади”.
Қайд этиш керакки, “Ипак йўли дурдонаси” XIV Тошкент халқаро кинофоруми бошланишига роппа-роса 6 кун қолди, дейилади dunyo.info сайтида.
