«Бизнинг муаллифимиз ҳеч қачон Шарқда бўлмаган ва Марказий Осиё ҳақида жуда кам тасаввурга эга эди. Энди у ушбу минтақага йўл олди ва Ўзбекистоннинг ранг-баранг тарихидан ҳайратда, деб ёзади нашр. Чунки кўҳна Ипак йўлидаги ушбу мамлакат маданиятлар чорраҳаси ва ривожланаётган минтақадир.
Агар Ўзбекистон сизнинг саёҳат йўналишларингиз рўйхатида бўлмаган бўлса, сиз ҳам мен кабисиз. Мен Шарқ ёки Марказий Осиёга ҳеч қачон саёҳат қилмаганман, бу минтақа ҳақидаги билимларим ҳам жуда чекланган. Бу мамлакатнинг хилма-хиллиги янада ҳайратланарли ва мафтункордир».
Муаллифнинг таъкидлашича, саёҳатга 3 май куни Берлиндаги Жеймс Саймон галереяси ва Янги музейда очиладиган Ўзбекистон археологик хазиналарининг катта кўргазмаси сабаб бўлган. Шунингдек, у ёрдамчи саёҳлик дастури ва кўплаб кундалик тафсилотлар қизиқарли бўлганини таъкидлайди.
Мақолада қайд этилишича, Хитойни Ўрта ер денгизи билан боғлаган қадимий Буюк Ипак йўлида жойлашган ушбу мамлакат ҳудуди маданиятлар чорраҳасига айланган. Бундан ташқари, Амир Темур ва Александр Македонский каби турли давр ҳукмдорлари бу ерда ўз изларини қолдирган. Шунга кўра, юнон, араб, рус, ҳинд ва хитой таъсири ҳамма жойда сезилади.
«Ўзбекистон ўтиш давридаги, ривожланаётган давлат, деб ёзади нашр. 2016 йилда Шавкат Мирзиёев Президент этиб сайланганидан сўнг авваллари яккаланиб қолган собиқ иттифоқнинг ушбу республикаси хорижий инвесторлар ва сайёҳлар учун очилди. Мамлакат катта маблағ сарфламоқда, кўп жойларда қурилишлар жадал давом этаётир».
Муаллиф уйга учиб кетишга ҳали эрта эканини, кашф қилиниши керак бўлган жуда кўп нарсалар борлигини таъкидлайди. Унинг ёзишича, Ўзбекистон билан танишиш май ойида – Буюк Ипак йўли Берлин музейига қадар чўзилганида давом этади.
