Шу кунларда мамлакатимиз аҳли қутлуғ санага тараддуд кўрмоқда. Ўзбекистон Республикаси Конституцияси қабул қилинганининг 28 йиллиги муносабати билан жойларда турли маънавий-маърифий тадбирлар, учрашувлар, байрам тантаналари, марафон ҳамда спорт мусобақалари бўлиб ўтмоқда.
Жумладан, Наманганда ҳам 4-5 декабрь кунлари Ўзбекистон Республикаси мудофаасига кўмаклашувчи "Ватанпарвар" ташкилоти ташаббуси билан ёшлар ўртасида пневматик қуролдан ўқ отиш бўйича вилоят биринчилиги ўтказилди. Мусобақада 154 нафар спортчи ёшлар иштирок этди. 7 ёш ва ундан катта бўлган спортчиларнинг 91 нафарини ўғил болалар, 63 нафарини қизлар ташкил этди.
Мусобақа якуний натижаларига кўра, 1-ўринни вилоят техник ва амалий спорт турлари маркази жамоаси, 2-ўринни Наманган шаҳри жамоаси ва 3-ўринни Уйчи тумани жамоаси эгаллади.
Тантанали тақдирлаш маросимида Наманган шаҳар ҳокими О. Исаев, "Ватанпарвар" ташкилоти Наманган вилояти кенгаши раиси, Халқ депутатлари вилоят Кенгаши депутати А. Алаходжаевлар иштирок этиб, ғолибларга “Фахрий ёрлиқ” ва эсдалик совғаларини топширдилар.
Санжарбек ҲАМИДОВ
