Москва мэрининг ижтимоий ривожланиш бўйича ўринбосари Анастасия Ракова коронавирусга қарши препаратни рўйхатдан ўтказишдан кейинги тадқиқотлар доирасида москваликларни эмлаш бошланганини маълум қилди.
Ракованинг сўзларига кўра, дастлабки иштирокчилар аллақачон пойтахт тиббиёт муассасаларида эмланган. Ҳаммаси бўлиб 35 мингдан ортиқ москвалик COVID-19га қарши вакцина тадқиқотида иштирок этиш учун ариза топширди ва шаҳар ҳокими ўринбосарининг сўзларига кўра, мурожаат этувчилар сони кун сайин ошиб бормоқда.
Ҳоким ўринбосари эмлаш икки босқичда амалга оширилишини таъкидлади. Биринчи босқичда кўнгиллиларга вакцинанинг биринчи компоненти, 21 кундан кейин эса иккинчиси қилинади. Компонентлар уларнинг таркибига кирадиган фаол моддалар билан ажралиб туради — бу организмнинг иммунитет ҳимоясини кучайтириш учун қилинган.
Бугунги кунга келиб Москвадаги олтита тиббиёт муассасасида коронавирусга қарши вакцинани ўрганиш ишлари олиб борилмоқда ва кейинчалик уларнинг сони 20 тага етади.
Москвада мажбурий тиббий суғурта полиси бўлган, Россия Федерациясининг вояга етган фуқаролари вакцинани тадқиқ қилишнинг учинчи босқичида иштирок этишлари мумкин. Эмлашдан олдин кўнгиллиларда ЎРВИ, ҳомиладорлик ёки ўтказилган COVID-19ни ўз ичига олган текширувдан ўтади. mos.ru порталида вакцинанинг клиник синовида қатнашиш учун мурожаат қилиш мумкин. Эмлаш бепул. Препарат қабул қилинганидан кейин тиббиёт ходимлари кўнгиллилар билан доимий алоқада бўлишади.
