Янги Ўзбекистон ташқи сиёсатида давлатлараро муносабатлар фақат сиёсий мулоқот ёки иқтисодий манфаатлар эмас, балки таълим, илм- фан ва инсон капиталини ривожлантириш орқали мустаҳкамланаётгани ҳам бор гап.

Президентимизнинг яқинда Тур­кияга навбатдаги расмий ташрифи ҳар томонлама алоқаларни мазмунан янги босқичга олиб чиқишга хизмат қилади. Мазкур ташриф дўстлик ришталари­га таянган муносабатларни замонавий стратегик шериклик даражасига кўта­риш, энг муҳими, келгуси тараққиётни белгиловчи соҳалар, хусусан, таълим ва инновацияларни ҳамкорлик асосига айлантиради.

Бу галги ташриф икки давлат ўр­тасида сиёсий ишонч, иқтисодий тенг манфаатдорлик ва интеллектуал сало­ҳият уйғунлашаётганини яққол намоён этди. Айниқса, олий таълим ва илм-фан соҳасидаги ҳамкорлик масалаларига алоҳида эътибор қаратилгани таш­рифнинг узоқ муддатли аҳамиятини белгилаб бермоқда. Давлат раҳбарла­рининг тор доирадаги учрашуви, олий даражадаги Стратегик ҳамкорлик кен­гашининг тўртинчи йиғилишидаги иш­тироки билан бир қаторда Истанбулда биринчи ўзбек мактабининг барпо эти­лиши икки мамлакат ўртасида илм-фан соҳасидаги ҳамкорликнинг ўзига хос намунаси сифатида тарихга муҳрланди.

Ҳар бир давлатнинг рақобатбар­дошлиги таълим тизими билан баҳо­ланади. Шу маънода, Ўзбекистон ва Туркия ўртасидаги ҳамкорликда таъ­лим масаласининг устувор йўналиш сифатида ўрин эгаллагани бежиз эмас. Сўнгги йилларда икки давлат олий таълим муассасалари ўртасида қўшма таълим дастурлари, академик алма­шинув, илмий тадқиқотлар ва педагог кадрлар тайёрлаш бўйича тизимли иш­лар бажарилмоқда.

Юртимизда таълим соҳасига қара­тилаётган юксак эътибор олий таълим муассасалари олдига янги вазифа­ларни қўймоқда. Халқаро ташрифлар натижасида берилаётган имкониятлар ўқитиш сифатини ошириш, халқаро тажрибани атрофлича ўрганиш ва уни миллий таълим тизимига мослашти­ришни талаб этади. Туркия универ­ситетлари билан ҳамкорлик ёшлари­мизнинг дунёқарашини кенгайтириш, илмий салоҳиятини ошириш ва глобал рақобатга тайёр мутахассислар этиб тайёрлашда муҳим омил бўлиб хизмат қилади. Хусусан, мамлакатнинг илғор ОТМлар 1000 талиги рўйхатидан ўрин олган нуфузли университетлари билан ҳамкорлик қилиш учун Бухоро давлат педагогика институти ҳам салмоқли одимлар қўймоқда. Жумладан, Йил­диз техника, Ҳажеттепе, Ҳожи Байрам Вали, Гази университетлари билан қатор истиқболли ҳамкорлик йўна­лишлари бўйича англашув меморан­думлари имзоланди. Меморандумлар доирасида профессор-ўқитувчилар ва талабалар алмашинуви, магистратура ва докторантура даражасида илмий раҳбарлик, икки дипломли дастур­лар, шунингдек, Эрасмус+ ва бошқа халқаро грантлар бўйича ҳамкорлик­ни йўлга қўйиш масалалари келишиб олинди. Ўзбек тили, маданияти ва миллий санъатини янада юксак кўта­риш, ўзбек тили дарсларини Бухоро давлат педагогика институти профес­сор-ўқитувчилари иштирокида Тур­кия университетларида онлайн ўтиш, миниатюра санъатини ривожланти­риш мақсадида олийгоҳлар ўртасида талабалар алмашинувини йўлга қў­йиш бўйича аниқ механизмлар ишлаб чиқилди.

Давлатимиз раҳбарининг Тур­кияга расмий ташрифи икки давлат ўртасидаги савдо ҳажмини ошириш, қўшма корхоналар сонини кўпайти­риш, транспорт соҳасидаги фаолият­ни мустаҳкамлаш, энг муҳими, ёшлар ва таълим соҳасидаги алоқаларни кенгайтириш — ҳамкорликнинг узоқ муддатли пойдеворини яратишга хизмат қилади. Янги Ўзбекистон та­раққиёт йўлининг асосий йўналиши сифатида таълим ва илм-фан соҳаси танлангани эса шу йўлда қатъий қа­дам қўйиш зарур эканини кўрсатиб берди. Бугун йўлга қўйилаётган ҳамда эришилаётган муҳим сиёсий ва ҳам­корлик келишувлари яқин орада сама­ра бериши шубҳасиз. Чунки билимли ва замонавий фикрлайдиган ёш авлод таълимига қаратилган эътибор ёрқин келажак сари қўйилган энг ишончли қадамдир.

Баҳодир МАЪМУРОВ,

Бухоро давлат педагогика

институти ректори, педагогика фанлари доктори,

профессор

Ҳамкорлик материали