Ўзбекистон чемпионатининг ўсмирлар ўртасидаги баҳсларида Нукус, Урганч, Самарқанд, Гулистон ва Наманган Олимпия захиралари коллежлари жамоалари ғолиблик учун ўзаро мусобақалашган бўлса, қизлар ўртасида Қорақалпоғистон Республикаси, шунингдек Жиззах, Андижон ва мезбон Наманган вилояти баскетболчилари ўз имкониятини синовдан ўтказишди.
Якуний натижаларга кўра, ўсмирлар ўртасида Наманган вилояти жамоаси барча рақибларидан устун келиб, фахрли 1-ўринни қўлга киритди. 2-ўрин эса Хоразм вилояти жамоасига насиб этган бўлса, кучли учликка Самарқанд вилояти якун ясаб берди.
«Ўз уйингда деворлар ҳам суяйди», деганларидек қизлар ўртасида ўтган қизғин ва муросасиз баҳслар якунида ҳам мезбон – наманганлик спортчилар олтин медаль соҳибасига айланишди. Улар ҳал қилувчи финал баҳсида Қорақалпоғистон Республикасидан келган дугоналаридан устун келишди. Бронза медалини эса Жиззах вилояти жамоаси қўлга киритди, деб хабар беради Наманган вилоят ҳокимлиги матбуот хизмати.
