Шу боис, маҳкум ва уларнинг яқинлари Наврўзни катта орзу билан кутишди. Ниҳоят улар кутган кун келиб, орзулар ушалди. Президент афв этганлар оиласида байрам ортидан байрам, қувонч ёшларига тўлди.
Давлатимиз раҳбарининг “Наврўз” умумхалқ байрами арафасида “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Фармонни имзолади. Бу эса азалий байрам руҳи, халқимиз табиатидаги эзгулик, бағрикенглик, инсонпарварлик, меҳр-оқибат ва кечиримлилик фазилатларига ҳамоҳанг эканлигининг ёрқин ифодаси бўлди.
Мазкур ҳужжатга мувофиқ, жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 140 нафар фуқаро афв этилди. Уларнинг 4 нафари асосий жазодан тўлиқ, 69 нафари эса жазони ўташдан муддатидан илгари шартли озод қилинди. Яна 8 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 59 нафар шахсга тайинланган озодликдан маҳрум этиш жазосининг муддатлари қисқартирилди.
Афв этилганлар орасида 12 нафари чет эл фуқароси, 9 нафари 60 ёшдан ошган шахс, 13 нафари аёл ҳамда 14 нафари тақиқланган ташкилотлар фаолиятида қатнашган шахс ҳисобланади.
Фармон ижроси юзасидан афв этилган шахсларни ижтимоий ҳаётга мослашиб, фойдали меҳнат билан шуғулланиб, жамиятда муносиб ўрин топишлари учун уларга кўмак бериш бўйича масъул вазирлик ва идораларга тегишли топшириқлар берилди. Шу боис, энди афв этилган инсонлар шарқона янги йилни эзгу ният билан бошлайди. Билиб-билмай қўл урган қилмишларини такрорламаслигида эса покланиш, янгиланиш айёмидан куч олиб эзгу амалларга бел боғлашади.
Санжар ИБАДОВ,
жиноят ишлари бўйича
Тошкент шаҳар Яккасарой
туман суди судьяси
