Бу ҳақда Соғлиқни сақлаш вазирлиги ахборот хизмати маълум қилди.
Қайд этилишича, Умаржон Абдураззоқов 4 ёшида тасодифан каустик сода ичиб қўйган. Бу эса унинг қизилўнгачида оғир чандиқли торайишга олиб келиб, вақт ўтиши билан бола умуман овқатлана олмай қолган.
Шундан сўнг у Республика шошилинч тиббий ёрдам илмий марказига олиб келинган. Дастлаб шифокорлар унинг ошқозонига махсус найча ўрнатиб, овқатланишини вақтинча тиклашга муваффақ бўлишган. Кейин эса мураккаб жарроҳлик амалиёти зарурлиги айтилган.
Бироқ ота-она болани хорижда даволатишга қарор қилган. Чет элда ўтказилган операциядан сўнг эса вазият янада оғирлашган.
Умаржон яна юқоридаги тиббиёт муассасасига қайтарилган. Текширувлар натижасида маълум бўлишича, хорижда операция пайтида ошқозон юқорига кўтарилиб, қизилўнгач ўрнига уланган. Бу эса юракка босим бериб, уни сиқиб қўйган.
Шундан сўнг тиббиёт фанлари доктори, профессор Ҳабибулла Оқилов бошчилигидаги жамоа томонидан қарийб 5 соатлик ўта мураккаб операция ўтказилди. Унда ошқозон ўз ўрнига қайтарилиб, йўғон ичакдан янги қизилўнгач шакллантирилди.
Юртимизда илк бор амалга оширилган мазкур операция муваффақиятли якунланди. Айни пайтда боланинг аҳволи яхши, яқин кунларда у оиласи бағрига қайтиши кутилмоқда.
