Ташрифнинг иккинчи кунида Ёнгсан госпиталининг урология, эндокринология, анестезиология ҳамда неврология соҳаси мутаҳассислари Тошкент тиббиёт академияси талабалари билан учрашди. Учрашув аввалида меҳмонлар мазкур ҳамкорлик ўтган йили бошланганини этироф этди. Ўшанда академия ректори А.Шодмонов бошчилигидаги делегация билан музокаралар чоғида меморандум имзоланиб, бир неча йўналишда ҳамкорлик юзасидан йўл харитаси тузилганди. Шунга кўра, ТТА тасдиқлаган ташриф дастури ижроси юзасидан Пусан Миллий университети Ёнгсан госпитали мутахассислари ўқув семинарлари бошланди.
Халқаро семинар доирасида урология, неврология ва тиббий психология, 2-сонли ички касалликлар ва эндокринология, анестезиология ва реаниматология кафедралари профессор-ўқитувчилари, докторант ҳамда талабалари учун маҳорат дарслари ҳам ўтказилди. Меҳмонларга Тошкент тиббиёт академиясининг янги, замонавий ва муҳташам ўқув биноси, клиник базаси ҳамда илғор тиббий ускуналар билан жиҳозланган Симуляция маркази кўрсатилди.
Халқаро семинар сўнгида Пусан Миллий университети Ёнгсан госпитали вакилларига “Тошкент тиббиёт академияси фахрий профессори” унвони топширилди. Тошкент тиббиёт академияси мутасаддилари Пусан Миллий университети Ёнгсан госпитали вакиллари билан келгусидаги ҳамкорликни янада ривожлантириш борасида музокаралар олиб борди.
