Эртага юртимизда давом этаётган 23 ёшгача бўлган футболчилар ўртасида Осиё чемпионати чорак финал ўйинлари бошланади. Унда мамлакатимиз терма жамоси Ироқ ёшларини қабул қилади. Шу муносабат билан “Бунёдкор” стадионида икки жамоа бош мураббийлари иштирокида матбуот анжумани бўлиб ўтди. Биринчи бўлиб Ўзбекистон термаси мураббийи Темур Кападзе журналистлар саволларига жавоб қайтарди.
— Ҳар бир ўйин ўзига яраша қийин кечади. Биз жиддий рақиблар билан ўйин ўтказдик. Энг муҳими, гуруҳда биринчи ўринни олиб чорак финалга чиқдик. Бундай мусобақаларда кучсиз рақиб бўлмайди. Олдинда бизни оғир ўйинлар кутяпти, — деди Кападзе.
У журналистнинг Ироқни мағлуб этсак, дуч келишимиз мумкин бўлган Япония ёки Корея жамоалари ҳақидаги саволига жавоб берар экан, “Япония ёки Корея қанчалик кучли эканлигини яхши биламиз. Биз ҳам кучсиз эмасмиз. Аммо ҳозир асосий эътиборни Ироқ билан бўладиган ўйинга қартганмиз”, деди.
— Ироқнинг катталар жамоаси ҳам, ёшлар жамоаси ҳам кучли ўйин кўрсатади. Уларнинг ўйинини кузатдик... Биз ўз ўйинимизни кўрсатиб, рақибни енгишга ҳаракат қиламиз. Футболчиларимиз эртанги ўйинга руҳий жиҳатдан ҳам, жисмоний жиҳатдан ҳам тайёр, — дея ўз сўзини якунлади Кападзе.
Ироқ термаси мураббийи Мирослав Соукуп матбуот анжуманида жамоасини эртага оғир ўйин кутиб турганини таъкидлади.
“Биз чорак финалга чиққанимиздан хурсандмиз. Гуруҳ ўйинларини асосан Қаршида ўтказдик. Тошкентга келгач кайфиятимиз янада кўтарилди. Эртага бизни майдон эгаларига қарши жиддий ўйин кутиб турибди. Биз 30 минг фанатга қарши ҳам ўйнашимиз керак. Шундай бўлса-да Ироқ футболи узоқ кутган ғалабага эришмоқчимиз”, деди у.
Мураббий мухбирнинг Ўзбекистон термаси ҳақидаги саволга жавоб берган экан бундай деди:
— Албатта, майдон эгалари кучли жамоа. Аммо биз ҳам ҳали барча сирларимизни очганимиз йўқ. Тайёргарлик жараёнида Ўзбекистон термасининг барча ўйинларини жиддий кузатдик, Ҳар бир футболчининг ҳаркатларини таҳлил қилдик. Рақибларимиз ҳар томонлама кучли, 90 дақиқа бир текис ўйнай олади. Бир ўйинда Катар дарвозасига 6 та тўп киритишнинг ўзиям рақиб қанчалик кучли эканлигини кўрсатиб турибди.
Матбуот анжуманида Ўзбекистон термаси сардори Жасур Жалоллиддинов ва Ироқ термаси футболчиси Муҳаммад Карим ҳам журналистлар саволларига жавоб қайтарди.
