Давлат хизматлари агентлиги Тошкент вилояти бошқармасида XXXII ёзги олимпия ўйинлари ғолиби, умумий ҳисобда 430 килограмм тош кўтариб, олимпия рекордини ўрнатган ҳамда Ватанимизга иккинчи олтин медални келтирган оғир атлетикачи Акбар Жўраев билан учрашув бўлиб ўтди.
Тадбирда бошқарма бошлиғи И. Абдусатторов сўзга чиқиб, Ўзбекистоннинг жаҳон ҳамжамиятига танилишида спортнинг аҳамияти, ўрни беқиёс эканлиги, спортни ривожлантиришга давлатимиз томонидан катта эътибор қаратилаётганлигини айтиб ўтди.
Шунингдек, учрашувда Токио — 2020 ёзги олимпия ўйинларида спортчиларимиз қўлга киритган ютуқлар Она Ватанимиз истиқлолининг 30 йиллигига муносиб совға сифатида барчамизга чексиз қувонч улашганлиги, дунёнинг энг кучли спортчилари қатнашган мусобақада мамлакат шарафини муносиб ҳимоя қилиш — ҳақиқий қаҳрамонлик эканлиги таъкидланди.
— Спортчига билдирилган ҳар қандай ишонч унинг олға интилишида катта куч беради, — деди олимпиада чемпиони ва рекордчиси Акбар Жўраев. — олимпия ўйинлари ҳар қандай спортчи учун катта синов ҳисобланади. Бугунги учрашувда эришган ютуқларимиз, олимпиада йўлланмасини қўлга киритгунча бўлган машаққатли йўл, мусобақалардан олган таассуротларим ҳақида сўзлаб бердим.
Учрашув қизиқарли савол-жавобларга бой бўлди. ДХМ ва ФҲДЁ ходимларининг спортчига бераётган саволларидан уларнинг спортга, соғлом турмуш тарзига бўлган қизиқишлари юқори даражада эканлигини англаш қийин эмас. Самимий руҳда кечган учрашувда олимпиада ғолиби берилган саволларга ўз ҳаёти, тажрибаси мисолида жавоб берди.
Учрашув якунида Акбар Жўраевга бошқарманинг эсдалик совғалари топширилди.
ДХА Тошкент вилояти бошқармаси
матбуот хизмати
