Институт ўз фаолиятини Европа ва Осиёнинг етакчи олий таълим даргоҳлари билан ҳамкорлик ўрнатган ҳолда таълим жараёнига Буюк Британия, АҚШ, Белгия, Жанубий Корея, Саудия Арабистони ва бошқа давлатлардан келган халқаро профессор-ўқитувчилар кенг жалб қилган.
Хорижий тилларни ўрганишни оммалаштириш агентлиги вакиллари, институтнинг асосий ҳамкорларидан бўлган “World Edupia corporation” компаниясининг бош менежери Жунг Йийонг, Жанубий Кореянинг “Hankyong national university”нинг халқаро ҳамкорлик бўйича директори, профессор Сул Мин Син ҳамда халқаро ҳамкорлик бўйича директор ўринбосари, профессор Лим Сенжонгнинг Наманган шаҳрига ташрифи амалга оширилди.
Ташриф давомида Тошкент шаҳридаги Ёджу техника институти ва Корея Республикасидан “Hankyong national university” ҳамкорликда 2+2 ва 3+1 форматида олий таълимни ташкил этиш ва бевосита Кореяда таълим олиш бўйича ҳамкорликни амалга ошириш борасида учрашувлар ташкил этилди. Унда Наманган шаҳри ва вилоятининг барча ўрта мактаб битирувчилари, уларнинг ота-оналари, устозлари, ҳокимлик ва халқ таълими идоралари, ёшлар иттифоқининг ҳудудий вакиллари фаол иштирок этди. Хорижлик меҳмонлар ва Тошкент шаҳридаги Ёджу техника институти вакиллари ўзларининг тақдимотларини тарқатма материаллар ҳамда видеоматериаллар билан бойитган ҳолда амалга оширди.
Шунингдек, ёшларни қизиқтирган таълимга оид долзарб масалалар бўйича саволларига кенг ва атрофлича жавоб берилди. Меҳмонлар куннинг иккинчи ярмида Тошкент шаҳридаги Ёджу техника институтининг Наманган филиалига ташриф буюриб, у ердаги бунёдкорлик ишлари билан ҳамда таълим жараёни билан яқиндан танишди. Филиалда таҳсил олаётган талабалар билан давра суҳбати ташкил этилиб, маслаҳатлар берилди. Кун сўнгида меҳмонлар гуллар диёри Наманганда ташкил этилаётган “Халқаро гуллар фестивали”га тайёргарлик ишлари билан танишди.
Янги Ўзбекистон келажак авлодларини муносиб тарбиялашда, таълим сифатини юқори даражага олиб чиқишда, юқори малакали мутахассисларни тайёрлашда “World Edupia corporation” компанияси ҳамда Жанубий Кореянинг “Hankyong national university” билан ҳамкорликни изчил давом эттиришга келишиб олинди.
