ZOE компанияси сайтида берилган хабарда таъкидланишича, дастлабки таҳлиллар дельта ва омикрон ўртасида кескин фарқларни аниқламаган. Иккала ҳолатда ҳам, касалликнинг илк кунларида COVID-19нинг асосий белгилари — иситма, йўтал, ҳид ёки таъмни йўқотиш инфекция юқтирганларнинг ярмидан кўпида кузатилган. Қайд этилишича, коронавируснинг омикрон штамми белгилари эмланган одамларда кузатилган дельтанинг енгил вариантига ўхшайди.
Мутахассислар янги штамм билан касалланган беморларнинг кўпчилигида кузатилган бешта асосий аломатни аниқлади: бош оғриғи, бурун оқиши, аксириш, томоқ оғриғи ва чарчоқ. Баъзи одамлар йўтал, иштаҳани йўқотиш ва миядаги оғирлик ҳақида ҳам хабар беришган.
“Омикроннинг аксарият аломатлари эмланган одамларда учрайдиган енгил дельта вариантига ўхшайди”, деди ZOE COVID Study лойиҳаси раҳбари, профессор Тим Спектор.
Унинг фикрича, коронавирусга нисбатан заррача шубҳа бўлганда ҳам тест топширган маъқул. Бусиз, ҳатто тажрибали шифокор ҳам янги штаммнинг аломатларини оддий шамоллашдан ажрата олмайди.
Шу билан бирга, AҚШ Касалликларни назорат қилиш ва олдини олиш марказлари Омикроннинг асосий белгилари киритилган бироз бошқачароқ рўйхатни шакллантирди. Унда йўтал, чарчоқ, бурун битиши ва оқиши асосий белги сифатида қайд этилган.
Aввалроқ, Жанубий Aфрика Тиббиёт Aссоциацияси раиси Aнжелика Кутзи Жанубий Aфрикада омикрон билан касалланган биринчи беморларда аломатлар “жуда енгил” бўлгани ва асосан томоқ оғриғи билан чекланганини айтди.
