Аниқланишича, Ўзбекистон Республикаси Президентининг 2021 йил 24 декабрдаги ПҚ-62-сон қарорига кўра, ҳоким ёрдамчилари фаолиятини самарали ташкил этиш ва баҳолаб бориш имконини берувчи ҳамда тегишли вазирлик ва идоралар маълумотлар базалари билан интеграция қилинган “Онлайн маҳалла” электрон платформаси ишга туширилишини таъминлаш вазифаси белгиланган.
Шунга кўра, Ўзбекистон Республикаси Вазирлар Маҳкамасининг Фармойишига мувофиқ, Маҳаллабай ишлаш ва тадбиркорликни ривожлантириш агентлиги ва “REALSOFT” МЧЖ билан 2022 йил 18 май куни жами 8,4 млрд сўмлик қийматдаги “Онлайн маҳалла” платформасини яратиш ва техник хизмат кўрсатиш бўйича тўғридан-тўғри шартнома расмийлаштирилган.
Агентлик томонидан шартнома қиймати бозор тамойилларига мос тарзда шакллантирилганлигини ўрганиш мақсадида мазкур соҳада фаолият юритувчи 3 та корхонага сўров юборилди.
Ушбу корхоналар томонидан “Онлайн маҳалла” платформаси 4,2 -5,1 млрд. сўмга яратиб берилиши, шу жумладан, бир йил давомида техник хизмат кўрсатиб борилиши ҳақида тижорат таклифлари тақдим қилинди.
Бундан ташқари, Ўзбекистон Республикасининг “Давлат харидлари тўғрисида”ги Қонуннинг 71-моддасида тўғридан-тўғри шартномалар бўйича давлат харидлари Ўзбекистон Республикаси Президентининг фармонлари ва қарорлари, Ўзбекистон Республикаси Вазирлар Маҳкамасининг қарорлари асосида амалга оширилиши кўрсатилган.
Шунга кўра, “Онлайн маҳалла” платформасини яратиш бўйича ўтказилган давлат харидини амалга ошириш жараёнида қонунчилик талабларига тўлиқ риоя қилинганлигига, шунингдек, товарларни, ишлар ва хизматлар нархлари бозор тамойиллари асосида шакллантирилганлигига қонуний баҳо бериш учун тўпланган ҳужжатлар Бош прокуратурага юборилди, — дейилади Коррупцияга қарши курашиш агентлиги расмий хабарида.
