Бугун Таиландга қарши бўлиб ўтадиган баҳсдаги ҳар қандай натижа бизни ва рақибимизни қитъа чемпионатига чиқиши учун тўсқинлик қила олмайди.
Бироз аввал Осиё кубоги-2023 саралаши доирасидаги Фаластин - Филиппин учрашуви якунланди. Ушбу баҳсда Фаластин 4:0 ҳисобида ғалаба қозониб, Осиё кубогига йўлланмани қўлга киритди. Филиппин 4 очко билан гуруҳда иккинчи ўринда бормоқда.
Айни пайтда 6 та гуруҳда саралаш ўйинлари бўлиб ўтмоқда. Ҳар бир гуруҳда биринчи ўрин соҳиблари ва 5 та гуруҳда иккинчи ўринни олган жамоалар Осиё кубогига йўлланмани қўлга киритади. Фаластин ўрин олган гуруҳда иккинчи ўрин соҳиби 4 очко олиши аниқ, шу боис қолган гуруҳларда 6 тадан очкоси бор бўлган жамоалар қитъа чемпионатига йўлланмани қўлга киритди.
Иккита ўйинда иккита ғалабага эришган Ўзбекистон ва Таиланд терма жамоалари ҳам Осиё кубоги йўлланмасини қўлга киритди. Шундан келиб чиқиб айтиш мумкинки, бугунги Таиландга қарши баҳс шунчаки расмиятчилик аҳамиятига эга.
Шунингдек, бошқа гуруҳдаги қўшниларимиз – Қирғизистон ва Тожикистон ҳам Осиё кубогига чиқди. Эътиборлиси, Тожикистон ўз тарихида илк бор қитъа чемпионатида ўйнайди.
Ўзбекистон терма жамоаси эса Осиё кубокларида саккизинчи бор иштирок этади.
