Тошкент шаҳрида Қишлоқ хўжалигини ривожлантиришда гендер ёндашувларни жорий этиш бўйича стратегияси лойиҳаси ва Ўзбекистон Республикаси Қишлоқ хўжалиги вазирлигининг чора-тадбирлар режаси муҳокамаси бўлиб ўтди. Ҳужжат БМТнинг Озиқ-овқат ва қишлоқ хўжалиги ташкилоти (ФАО)нинг “Инклюзив қишлоқ хўжалиги сиёсатини амалга оширишни қўллаб-қувватлаш” лойиҳаси доирасида миллий ва халқаро экспертлар, жумладан, Қишлоқ хўжалиги вазирлиги ҳамда ФАОнинг Европа ва Марказий Осиё минтақавий бўлими мутахассислари иштирокида тайёрланган.
Гендер тенглиги 2030 йилгача бўлган Барқарор ривожланиш кун тартибининг асосий масаласи ҳисобланади. ФАО мамлакатларга 2030 йилгача бўлган Барқарор ривожланиш кун тартибини амалга ошириш бўйича эришилган ютуқларни мониторинг қилишда кўмаклашади. Хусусан, ташкилот 21 та кўрсаткич, шу жумладан, 5 мақсадга (Гендер тенглигини таъминлаш ва барча аёллар ва қизларнинг имкониятларини кенгайтириш) эришиш кўрсаткичларини мувофиқлаштирувчи вазифасини бажаради. Булар “Қишлоқ хўжалиги ерларига эгалик қилувчи аёллар улуши” ва “Ерга эгалик қилишда аёлларнинг тенглиги” кўрсаткичларидир.
Юқоридаги лойиҳа доирасида ФАО Ўзбекистон Республикаси Қишлоқ хўжалиги вазирлиги ва мамлакат агросаноат комплексига алоқадор бошқа ташкилотларга ижтимоий ҳимояга муҳтож қатламларнинг, биринчи навбатда, қишлоқ аёлларининг манфаатлари ва эҳтиёжларини ҳисобга олган холда тегишли сиёсат ва ечимларни ишлаб чиқиш ва амалга ошириш салоҳиятини мустаҳкамлашда техник ёрдам кўрсатади.
Қишлоқ хўжалигини ривожлантиришда гендер ёндашувларини жорий этиш бўйича стратегияси лойиҳаси ва Ўзбекистон Республикаси Қишлоқ хўжалиги вазирлигининг чора-тадбирлар режаси ушбу лойиҳа доирасида ФАОнинг Европа ва Марказий Осиё бўйича минтақавий бўлими мутахассислари билан биргаликда ишлаб чиқилмоқда. Ҳужжатни тайёрлашда аёлларнинг ер, саноат ва табиий ресурсларга эгалик қилиш ва тасарруф этиш, шунингдек молиявий хизматлар ва ихтисослаштирилган билимларга эга бўлиш имкониятларини кенгайтиришга алоҳида эътибор қаратилмоқда.
