Бу ҳақда Туризм қўмитаси Бутунжаҳон туризм ташкилоти (БМТ Туризм) томонидан эълон қилинган сўнгги таҳлилий маълумотларга асосланиб маълум қилди.
Қайд этилишича, мамлакатимизга ташриф буюрган халқаро туристлар оқими 2019 йил даражасига нисбатан 73 фоизга ошган. Бу эса Ўзбекистон туризмига халқаро майдонда берилаётган ижобий баҳо ва олиб борилаётган ислоҳотларнинг амалий самарасини кўрсатади.
БМТ Туризм рейтингига мувофиқ, туристлар сонининг 2019 йилга нисбатан ўсиш суръатлари бўйича Ўзбекистон Европа минтақасида энг яхши натижа қайд этган давлатлар орасида 2-ўринни эгаллади. Шунингдек, 2025 йилнинг дастлабки тўққиз ойида мамлакатга келган халқаро туристлар сони 2024 йилга нисбатан 13 фоизга ошиб, Ўзбекистон Европа минтақасида энг юқори ўсиш қайд этган ТОП–4 туристик йўналишлар қаторига киритилди.
БМТ Туризм ҳисоботида таъкидланишича, 2025 йил январь–сентябрь ойларида жаҳон бўйича халқаро саёҳатлар ҳажми ўртача 5 фоизга ошган ва глобал туризм пандемиядан кейинги барқарор тикланиш босқичига кирган. Ушбу ижобий тенденциялар фонида Ўзбекистоннинг натижалари мамлакатда олиб борилаётган узоқ муддатли ва изчил туризм сиёсати самарадорлигини яққол намоён этмоқда.
Маълум қилинишича, 2025 йилда Ўзбекистон бир қатор рекорд кўрсаткичларга эришган. Хусусан, йилнинг дастлабки 11 ойида 10,7 миллиондан ортиқ хорижий сайёҳ мамлакатимизга ташриф буюрган. Апрель ойидан бошлаб эса тарихда илк бор ҳар ойда миллиондан ортиқ сайёҳ қайд этилмоқда. Туристик хизматлар экспортидан тушган даромадлар 4,4 миллиард АҚШ долларидан ошган.
Сайёҳлар оқимининг ортиши виза режимининг кенгайтирилиши, транспорт логистикасининг яхшиланиши ва халқаро маркетинг фаолиятининг кучайтирилиши билан боғлиқ экани таъкидланмоқда. Шу билан бирга, янги меҳмонхоналар, саёҳат компаниялари ҳамда туризм соҳаси мутахассислари сонининг кўпайиши мамлакат инфратузилмасини янада мустаҳкамламоқда.
Анъанавий тарихий йўналишлар — Самарқанд, Бухоро ва Хива билан бир қаторда экологик ва гастрономик туризмга бўлган қизиқиш ҳам ортиб бормоқда. Бу эса Ўзбекистон сайёҳлик маҳсулотларининг хилма-хиллашувини ва мамлакатнинг глобал туризм бозорида рақобатбардошлигини ошираётганидан далолат беради.
