Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Равшанбек Алимов ҳамда Украина Олий Радаси Аграр ва ер сиёсати масалалари қўмитаси раиси ўринбосари Степан Чернявский раҳбарлигида ўтган тадбирда икки мамлакат ҳамкорлик гуруҳлари аъзолари иштирок этди.
Дўстона ва конструктив руҳда ўтган учрашувда икки томонлама муносабатларнинг бугунги ҳолати ва уларни ривожлантириш истиқболлари, шу жумладан, парламентлараро алоқаларни фаоллаштириш масалалари муҳокама қилинди.
Савдо-иқтисодий ва маданий-гуманитар ҳамкорликнинг асосий йўналишлари, ўзаро савдо ҳажмини ошириш, биргаликда илмий-маърифий лойиҳаларни амалга ошириш бўйича таклифлар кўриб чиқилди. Саноат кооперациясини ривожлантириш, хусусан, машинасозлик, фармацевтика ва бошқа соҳаларда ҳамкорлик қилиш, шунингдек, транспорт-логистика инфратузилмасидан самарали фойдаланишдан икки мамлакат манфаатдор экани таъкидланди.
Томонлар икки мамлакат қонунчилик органлари ўртасидаги ҳамкорликни янада ривожлантириш, қонун ижодкорлиги ва парламент назоратининг турли жиҳатлари юзасидан тажриба алмашиш муҳимлигини таъкидладилар. Парламентлараро, шу жумладан, халқаро парламентлараро ташкилотлар доирасида ҳамкорликни кучайтириш механизмлари хусусида фикр алмашилди.
Муносабатларни парламентлараро дўстлик гуруҳлари форматида давом эттириш муҳимлиги қайд этилди. Парламент делегацияларининг ўзаро ташрифларини ташкил этиш ҳамда кун тартибини янги амалий мазмун билан тўлдириш юзасидан келишувга эришилди, деб хабар беради Ўзбекистон Республикаси Олий Мажлис Сенати матбуот хизмати.
Мажлисда Ўзбекистон Республикасининг Украинадаги Фавқулодда ва мухтор элчиси Алишер Курманов ҳамда Украинанинг Ўзбекистон Республикасидаги Фавқулодда ва мухтор элчиси Николай Дорошенко иштирок этди.
