Ҳиндистон ташқи сиёсат маҳкамасининг расмий веб-сайти ва унинг ижтимоий тармоқлардаги саҳифаларида Ўзбекистон хорижий мамлакатлар орасида биринчилардан бўлиб Ҳиндистонга инсонпарварлик кўмагини юборгани хабар қилинган. Алоҳида таъкидланганидек, Ҳиндистон учун оғир пайтда Ўзбекистон томонидан кўрсатилган бу мурувват икки мамлакат ўртасидаги стратегик шерикликни янада ривожлантириш ва чуқурлаштириш ишига хизмат қилади.
Ҳиндистон ТИВнинг «Instagram»даги расмий саҳифасида аэропортга етиб келган инсонпарварлик юклари ёнида Ўзбекистон элчиси Дилшод Аҳатовнинг инсонпарварлик ёрдамини ўз мамлакати ҳукумати номидан расман қабул қилиб олган Ҳиндистон ТИВ Евроосиё департаменти директорининг ўринбосари Бандару Вилсонбабу билан суратлари эълон қилинган. Бунга кўплаб ҳинд фуқаролари ва 10 мингдан зиёд фойдаланувчи ўзларининг ижобий муносабатларини билдирган.
Шу билан бирга, Ўзбекистон инсонпарварлик кўмаги тўғрисида Ҳиндистон ташқи сиёсат маҳкамаси томонидан эълон қилинган фотоматериаллар «Facebook» ва «Twitter» ижтимоий тармоқларида ҳам ўзининг катта акс-садосини берди.
Бу воқеа Ҳиндистоннинг «Times of India», «Hindustan Times», «NDTV», «Asian News International», «News18», «Zee5», «Business Standard», «India Times», «Free Press Journal», «Yahoo», «Big News Network», «Myword.in», «BBCNews Hindi», «ABP Live», «Janta Serishta», «ETV Bharat», «Taknew», «India Guru», «Mohalla Media», «Tele-News», «Pen News», «SRNews», «Kisaan Putra», «Daida News», «Jagran», «News On Air» ва бошқа нуфузли ОАВ саҳифаларида ҳам атрофлича ёритилди.
