Тошкент вилояти Ахборот хизматининг маълум қилишича, вилоятнинг шаҳар ва туманлари бўйича яшил, қизил ва сариқ ҳудудлар белгиланди. Унга кўра, Янгийўл шаҳри, Оққўрғон тумани, Зангиота тумани, Паркент тумани қизил ҳудудга киритилди. Сабаби бу туманлада охирги 14 кун ичида коронавирус инфекциясига чалинган шахслар аниқланган.
Сўнгги 14 кун давомида коронавирус инфекциясига чалинган шахслар аниқланмаган, бироқ ушбу касалликка чалинган ва даволанаётган шахслар мавжуд бўлган Aнгрен шаҳри, Чирчиқ шаҳри, Бекобод, Қибрай, Қуйи Чирчиқ, Ўрта Чирчиқ, Чиноз, Юқори Чирчиқ, Тошкент туманлари сариқ ҳудуд деб эълон қилинди.
Яшил (коронавирус инфекциясига чалинган шахслар аниқланмаган ёки аниқланган шахслар тўлиқ соғайган) ҳудудга эса Олмалиқ шаҳар, Оҳангарон шаҳар, Бекобод шаҳри, Нурафшон шаҳри, Оҳангарон, Бўстонлиқ, Бўка, Пискент туманлари киритилди.
