Чет эл тажрибаси бўйича ўқув дастурлари ишлаб чиқиш тўғрисида қабул қилинган қарор асосида Тошкент давлат транспорт университети ректорати бу соҳада хорижий мамлакатларнинг етакчи олимлари ва амалиётчилари гуруҳини шакллантиради.
Мамлакатимизнинг Варшавадаги дипломатия ваколатхонасида элчи Баҳром Бобоев Славомир Вроблевский билан учрашув ўтказди.
Мулоқот чоғида полшалик мутахассис шу пайтга қадар Самарқанд шаҳридаги Халқаро туризм университетининг Менежмент ва туризм факультети декани, қатор хорижий мамлакатларда, жумладан, Европа Иттифоқи эксперти, Лондон олий бизнес мактабининг маркетинг ва сайёҳлик бўйича ўқитувчиси, Қозоғистондаги Халқаро бизнес мактаби профессори сифатида фаолият кўрсатганини маълум қилди.
Ҳозирги пайтда Славомир Враблевский Европа Иттифоқининг Phare Бизнес туризм дастури бренд-менежери ҳисобланади.
Учрашувда Славомир Враблевский Польша ва Европа олий ўқув юртлари учун ишлаб чиқилган, айниқса, логистика ва транспорт коммуникациялари соҳасида Европанинг илғор тажрибаси билан максимал даражада тўйинтирилган қўшма таълим дастурларини илгари суриш учун кўмак кўрсатишга тайёр эканлигини айтди.
Ўзбекистон олий таълим тизимида Польша мутахассисларининг иштироки тобора кенгайиб боряпти. Масалан, 2017 йилдан буён Тошкент давлат аграр университетида полшалик мутахассислар мунтазам равишда «Замонавий аграр технологиялари» фанидан дарс бериб келяпти, 2021 йил апрель ойида эса Андижон шаҳрида Варшава Менежмент университетининг филиалини очиш тўғрисидаги ҳукумат қарори қабул қилинган, деб хабар беради «Дунё» АА.
