Айни вақтда муҳташам зал тадбиркорлар билан гавжум. Барча иштирокчилар давлат раҳбарининг тадбиркорлар билан мулоқотини янгича формат ва тарихий ташаббус сифатида баҳоламоқда.
Хоразм вилоятидан келган ёш тадбиркор, “Sevinch medikal centr” хусусий клиникаси раҳбари, “Ёшлар келажаги” медали соҳиби Шаҳло Йўлдошева ҳам шу фикрда.
– Президентимиз ёшларни қўллаб-қувватлаб, ҳар томонлама кўмак бериб келаётгани бизга жуда катта мотивация бермоқда. Шу эътибор ва ғамхўрликдан руҳланиб, 2018 йилда “Ёшлар келажаги” жамғармаси маблағи эвазига хусусий клиника очдим.
Бугунги кунда клиникамизда 60 га яқин мутахассис-ходим ишлаяпти. Фаолиятимизни ва хизмат кўрсатиш турини янада кенгайтиришни мақсад қилганмиз. Хусусан, онкологик касалликларни даволаш бўлимини очмоқчимиз.
Ўйлайманки, Президентимиз билан бугунги мулоқотимиз тадбиркорлар учун тарихий кун бўлиб қолиши ва фаолиятимизда янги саҳифалар очишига ишонаман. Ўз навбатида, барчамиз учун манфаатли таклифлар, ташаббуслар рўёби учун йўл очади.
