“Айтишим керакки, бу Россия Федерацияси Президентининг шахсий совғаси”, деди Россиянинг АҚШдаги элчихонаси маслаҳатчиси-элчиси Андрей Леденев.
Мақолада таъкидланганидек, Россия ва АҚШ раҳбарларининг учрашувидан бир неча кун олдин Уоррен телеканал сюжетларидан бирида журналистларга Россияга қарши санкциялар туфайли эски “Урал” мотоцикли учун эҳтиёт қисмларни топиш қийинлашиб қолганини айтган эди.
Репортаж эълон қилинганидан кейин россиялик дипломатлар америкаликни топиб, унга янги транспорт воситасини совға қилишди.
“Ушбу мотоцикл анча енгил, анча ёқимли ҳаракатланади. Менга эски мотоциклим ёқади, лекин бу мотоцикл анча яхши”, деб ўз таассуротлари билан ўртоқлашди у.
Шанба куни Владимир Путин ва унинг америкалик ҳамкасби Дональд Трамп Аляскада музокара ўтказди. Етакчилар учрашуви Анкориждаги Эльмендорф-Ричардсон ҳарбий базасида бўлиб ўтди. Тор форматдаги “учга уч” учрашуви икки соату 45 дақиқа давом этди.
Россия раҳбари учрашув якунлари бўйича таъкидлаганидек, томонлар Украинада тинчликка йўл очиши мумкин бўлган келишувга эришган. Ҳар икки Президент можарога барҳам бериш учун ҳаракат қилишга тайёрлигини маълум қилди.
Россия ва Ғарб вакиллари билан музокаралардан сўнг Трамп Украинадаги можарога барҳам беришнинг энг яхши йўли шунчаки сулҳ эмас, балки тинчлик келишуви билан боғлиқ умумий келишув эканини маълум қилди.
Европа Иттифоқи етакчилари, ўз навбатида, Европа Москвага нисбатан санкциялар босимини давом эттириш ниятида экани ҳақида қўшма баёнот берди, деб хабар берди ria.ru.
