Бу ҳақда 5 сентябрь, жума куни Владивостокда бўлиб ўтган Шарқий иқтисодий форумнинг ялпи мажлисида Россия Президенти Владимир Путин маълум қилди, деб хабар берди dw.com.
“Украинадаги эҳтимолий ҳарбий контингентларга келсак. Бу (Россия томонидан Украинага қарши бошланган урушнинг) асосий сабаблардан бири – Украинани НАТОга жалб қилиш. Шунинг учун, агар у ерда бирон бир қўшин пайдо бўлса, айниқса ҳозир, ҳарбий амалиётлар пайтида, бу уларни йўқ қилиш учун қонуний нишон бўлади”, дея Россия раҳбари сўзларидан иқтибос келтирди “Интерфакс”.
Шу билан бирга, Путин “агар узоқ муддатли тинчликка олиб келадиган қарорлар қабул қилинса”, унинг нуқтаи назари бўйича Украина ҳудудида хорижий қўшинларнинг бўлишига эҳтиёж қолмаслиги керак. Россия Президентининг сўзларига кўра, агар тинч йўл билан келишувга эришилса, Москва уларни “тўлиқ ҳажмда” амалга ошириш ниятида. Россия Федерацияси, шунингдек, “ҳам Россия, ҳам Украина учун ишлаб чиқилиши керак бўлган хавфсизлик кафолатларини ҳурмат қилади, албатта,” деди Путин.
